Shillong, Nailur, 16: Da ki spah ngut ki paidbah ki la tuid ban leit sngewlem ha ka sngi ontep ïa ka met ba dang sah jong i heprit Insaphira Lyngdoh Mawnai.
I heprit Insaphira i la jah rngai na phyllaw iing ha ka step sngi u Blei na ka shnong Nongrah, Shillong bad ïa ka met jong i la lap ba la pynthiah pyllup ha madan ba lang um bad la ban da u maw ha kawei ka ïing ba dang shna ha ka step Lah Sngi u Blei.
Ki Pulit jong ka East Khasi Hills District ki la thaw da ka Special Investigation Team (SIT) ba la khlieh da u Superintendent of Police (City) u Herbert Kharkongor ban pynlong ïa ka jingtohkit kaba bniah. Ki Pulit ki dangap ban ïoh pdiang ïa ka kaiphod Post mortem bad ïa ka kaiphod na ka Forensic khnang ban pynlong ïa ka jingbuddien kaba bniah bha ban ïohkem ïa ki riewthrang snam kiba donkti ha kane ka kam bymman.
Ka Synjuk ki Nongsynshar Shnong Nongthymmai Pyllun ryngkat bad ki paidbah nongshong shnong kynthup ruh bad ki khynnah skul ki la ïaid paidbah na Iew Rynjah shaduh ka iing sah jong i heprit Insaphira kum ka dak ban burom khatduh ïa ka jingleit ontep ïa ka met ba dang sah ka jong i.
Ki paidbah bad ki khynnah kiba pule ha ki skul kiba don ha ka thaiñ Nongthymmai Pyllun ki la rah ruh ïa ki plakad kiba la thoh ïa ki kyntien ban pynrem jur ïa ki riewthrang snam kiba la dkhat jubor ïa ka jingim jong i heprit Insaphira.
U President jong ka Synjuk u Bah Bantylli Nari ha ka jingïakren bad ki lad pathai khubor u la ong ba ka jingsynjor shaba palat jong ka aiñ ki nongleh kam sniew bad ki nongleh kam bymman ki lait da kaba suk na ki kti jong ka aiñ.
U la ong ba ka Sorkar lyngba ka Smat City Project ka ladei ban buh kham bun da ki CCTV Camera ha baroh kawei ka sor Shillong bad kumjuh ruh ha ki jaka khap sor khnang ba kan kham pynsuk ïa ki bor Pulit bad ïa ki bor synshar shnong ban kem ïa ki runar kiba donkti ha ki kam runar ruser.
“Ngi kyntu ruh ïa ka tnat Pulit ba kan pynlong ïa ka jingtohkit kaba bniah bad ban kem mardor ïa ki briew kiba donkti ha kane kam bymman ban shu leh dusmon ïa i khynnah i bym pat tip ïa ka bneng ka khyndew,” u la ong.
Na ka liang jong u Kpa i heprit Insaphira u la kyntu ïa ki paidbah ba kin weng noh ïa ki video bad ïa ki dur ba la thep ha ka Social Media.
