Shillong, Nailur, 16: Ka Meghalaya State Commission for Protection of Child Rights (MSPCR) ka la bthah ïa ki Pulit jong ka jylla ba kin pynsted ïa ka jingtohkit halor ka jingshah pynïap jong i heprit Insaphira Lyngdoh Mawnai, 4 snem ka rta ha Nongrah Nonglum, Shillong.
“Ka MSCPCR ka la kyntu ïa ki Pulit bad baroh ki tnad tohkit ba la donkam kyrkieh ban pynsted ïa ka jingtohkit halor kane ka jingjia ba shyrkhei. Ka jingtohkit kaba stet bad kaba bniah ka long kaba kongsan bha, ym tang na ka bynta ban pynïoh ïa ka hok khnang ban ai jingtngen ïa ka longïing kaba la mad ïa ka jingjia ba sngewsih kthang,” ong u Chairperson jong ka Commission ha ka sngi Baar.
I heprit Insaphira Lyngdoh Mawnai i la jahrnai na phyllaw iing lajong ha Nongrah Nonglum ha ka step sngi U Blei. Ïa ka met jong i la lap ha ka step Lah Sngi u Blei ba la pynthiah ha ka um ba lang ha kawei ka iing ba dang shna hajan ka iing sah jong.
Ka tnat Pulit ka la thaw da ka Special Investigation Team (SIT) ba la khlieh da u SP (City) Bah Herbert Kharkongor ban pynlong ïa ka jingtohkit halor ka jingïap jong i heprit Insaphira bad ban ïohkem ïa ki riewthrang snam kiba donkti ha ka kam bymman.
Ka Sangma ka la pyntip ba ka Commission ka la leit jngoh ruh mar mar ïa ka longiing tang shu ïoh ïa ka jingtip halor ka jingïap jong i heprit ba dang 4 snem ka rta ha Nongrah.
Ki dkhot jong ka Commission ki la don lang bad ki dkhot ka iing ka sem baroh shi sngi ban ai mynsiem ha ki kynta ba ki la mad ïa ki jingsngewsih kthang, bad la pynthikna ruh ba ki jingdonkam baroh ha NEIGRIHMS Hospital, kynthup ïa ka jingleh ïa ka Autopsy, yn ïoh ha ka por kaba biang.
“Ka MSCPCR ka pynpaw sa shisien ba ka jingduh noh ïa kano kano ka mynsiem ka dei ka mat jong ka jingsngewsih kaba jur khamtam eh ha kaba ïadei bad ka jingim jong i riewluilui. Ka Commission ka pynpaw ïa ka jingsngewlem kaba jur sha ka longïing kaba don hapdeng ka jingsngewsih bad ka pynpaw ruh ba kan don ryngkat bad ka iing ka sem ha kum kane ka por ba ki mad ïa ka jingsngewsih kthang,” ka la ong.
Ha kane ka khep, ka Sangma ka la ong ba ka Commission ka shim ruh ba ka long kaba donkam ban pynkynmaw ïa ki paidbah ba ka jingpynphriang ïa ki video ne ki dur jong ki khynnah kiba don ha ki jingjia kiba sngewsih ha ki Social Media kam dei tang ba ka long kaba khlem akor hynrei ka long ruh ka jingpynkheiñ ïa ka aiñ.
“Kum kine ki jingleh ki hap hapoh ka jingpeit jong ka Juvenile Justice Act (JJA) bad ka khring ïa ka jingpynshitom kaba tyngeh, kynthup ïa ka jingshah set phatok,” ka la ong.
