Shillong, Nailur, 17: Ka Tour Operator Association of Meghalaya (TOAM) ka la kyntu ïa ka All Khasi Meghalaya Tourist Taxi Association (AKMTTA) ba kan sangeh noh ïa ka jingïakhih bad ban pynsngew ïa ka jingud jingnam jong ka sha ka Sorkar.
“Ha kum kane ka por kaba eh, ka TOAM ka kyrpad ba ka AKMTTA ka dei ban sangeh noh mardor ïa ka jingïakhih bad ban rah ïa ki jingeh jong ki sha ka Sorkar ha ka rukom kaba kyrpang. Ngim lah ban buh jingma ïa ka jingïakhih kaba lah ban pynthut ïa ki nongjngohkai pyrthei kiba wan sha ka Jylla jong ngi,” la ong u President ka TOAM u Bah E. Banlumlang Blah ha ka jingïakren bad ki lad pathai khubor ha ka sngi Balang.
Ka TOAM ka la phah ruh ïa ka shithi sha ka AKMTTA hadien ba ka la don ka jingpynphai kylla ïa ki kali kiba kit ïa ki nongjngohkai pyrthei ban ym wan shuh sha ka jylla Meghalaya hynrei ban phah noh sha kiwei pat ki jylla ha ka thaiñ Shatei Lammihngi ka ri India.
“Kane ka jingjia kaba la pynkulmar jingmut kumba kaba ngi la sakhi ha u snem ba ladep ka la wanrah ïa ka jingduna bha jong ki nongjngohkai pyrthei ha kine ki khyndiat bnai ba ladep,” ong u Blah.
“Lada kane ka rukom kan dang bteng, ka buh jingma khlem lah shuh ban pynphai pat. Ki nongjngohkai pyrthei kiba shah pynkylla lynti shisien kin ym wan phai shuh. Ha ka jaka por, kin pynkylla junom ïa ki jingsngewtynnat jong ki shawei pat ki jylla kaba pynlong ïa ka kam jngohkai pyrthei jong ka Meghalaya ban tyrkhong. Ki hotel kin thylli, ki jaka bam kin shah ktah, ki taksi bad ki jaka sah kin sa hiar dor bha, lada kane ka jingjia kan dang ïai bteng, ka karkhana jong ngi kan sa ïaptram,” u la maham.
Da kaba pynskhem ba ka jingim jong ka kam jngohkai pyrthei jong ka Meghalaya ka shong ha ki jingïatreilang, u Bah Blah u la ong ba ka jingpynslem ne ka jingsngewrit kan pynsted tang ïa ka jinghiar kaba ngi baroh ngi pyrshang ban kiar.
“Ngi kyntu ïa ka seng jong phi ba kan shimkhia ïa kane ka kam da ka jingsngewkhia bad ban kular ban ïatreilang mardor khlem da pynthut ïa ka jingwan ki nongwan jngohkai pyrthei bad ki Taxi na Assam kiba kwah ban ïoh mad ïa ka jingitynnad jong ka Jylla jong ngi,” u la bynrap.
Ka AKMTTA ka la khot pynlong da ka jingïakhih ba khlem pud por naduh ka 16 tarik mynta u bnai da kaba dawa na ka sorkar jylla ban khang ïa ka jingrung jong ki kali kiba kit ïa ki nongjngohkai pyrthei kiba nabar ka jylla sha ki jaka jngohkai pyrthei bapher bapher jong ka jylla Meghalaya.
