Shillong, Risaw 07: Ki nongthep vote ha jylla Meghalaya ka la kiew da kumba palat 9 lak ha kine ki 20 snem ba la leit, ong u Chief Electoral Officer u Dr BDR Tiwari. U la pynpaw ba kane ka jingkiew ka la long kaba kongsan haba nujor ïa ka jingpynrung kyrteng kiba thep vote jong u 2025 kaba dei ruh ka jingpeit biang ne ka Intensive Revision ba la leh ha u snem 2005. Ka electoral roll kaba kham ha shwa ka dei kaba la pynmih ha ka 15 tarik u Ïaïong, 2005.
“Ka jingdon kiba thep vote ha u Nailur 2025 ka long kumba 23, 06,384 ngut haba nujor ïa ka 13,35,816 ha u snem 2005 ha kaba kane ka pyni ba ka la kiew da 9 lak ngut,” ong u Dr Tiwari ha ka sngi baar haba kren sha ki lad pathai khubor haba ïadei bad ka jingpynkhreh ïa ki kam na ka bynta ka Special Intensive Revision (SIR) kaba la leh dangshen ha jylla Bihar, bad na ka liang ka Election Commission of India ka dang don ha ka kam ban pynbna ïa ka SIR ha kylleng ri.
U la ong ba kane ka jingkiew kiba thep vote ha u Nailur 2025 ka pyni ba ka jingdon ki shynrang kiba thep vote ki long 11, 37,316 bad 11, 69,062 ngut ki kynthei. Ha ka jingpynïapher, ka jingdon ki nombar na ka bynta u snem 2005 ka long 6, 64,306 ki shynrang bad 6, 71,510 ki dei ki kynthei. Lah ban kdew ba ki don kumba 6 ngut kiba thep vote kiba dei ha ka kynhun third-gender ha u Nailur 2025, katba ha u snem 2005 kim don satia kum kine ki nongthep vote.
U la ong ba ki 4 tylli ki kynhun ki nongthep vote la dep ban jurip kaba long katkum ka SIR. Kine ki kynthup ïa ka category A – ha kaba ki nongthep vote ki dei kiba la dep pynrung kyrteng ha u snem 2005 ha kaba ïa ka voter list donkam ban upload ne submit tang ïa ka bynta kaba la shimnoh jong u snem 2005 ha ryngkat bad ki jingtip ba bniah ban pyni ha ka enumeration form, kiba thep vote ha ka category B ha kaba ïa ki kyrteng ym shym la lap ha ka thup kyrteng kiba thep vote u snem 2005 bad kiba la kha ha India shwa ka 1 tarik u Naitung, 1987, ki donkam ban upload ne submit tang ïa ki kot ha ryngkat bad ka enumeration form, ha ka category C – ki nongthep vote kiba la kha hapdeng ka 1 tarik u Naitung, 1987 bad ka 2 tarik u Nohprah, 2004 bad haba ka kyrteng jong ka kmie ne u kpa khlem pynrung kyrteng ha u snem 2005 ha ka voter list, ki donkam ban upload ne submit artylli ki kot, kawei ka dei ka self document bad kawei pat kaba lah ban dei jong ka kmie ne u kpa, bad ha ka category D – ki nongthep vote kiba la kha hadien ka 2 tarik u Nohprah, 2004 bad ha kaba ka kyrteng jong ka kmie bad u kpa khlem register ha u snem 2005 ha ka voter list ki donkam ban submit ne upload kumba lai tylli ki kot- kawei kadei ka self document, ka kot jong ka kmie bad kumjuh ruh jong u kpa.
U Dr Tiwari u la pyntip ruh ba ka Election Commission of India ka la pynbna ba hap ban pdiang ïa ki Aadhaar card kum ki valid identity proof na ka bynta ban pynrung kyrteng ïa kiba thep vote, ba kynthup ruh ïa ki 11 tylli ki kot kiba donkam. Kane ka rai ka wan hadien ka jingbthah ka Supreme Court ban kynthup ïa ka Aadhaar kum ka sakhi jingpynshisha ne proof of identity. “Ïa ka Aadhaar card yn kheiñ kum kawei napdeng ki 12 tylli ki kot na ka bynta ban pynrung kyrteng ïa ki nongthep vote,” u la bynrap.
Shuh shuh u CEO u la pyntip ba ka jingdon jong ki polling station hadien ba la khmih bniah ka la poi kumba 3615 tylli ha kaba ka la don ruh ka jingkiew kaba long kumba 64 tylli ki polling station. Baroh ki polling station ha kaba ka jingdon kiba thep vote ki la palat ïa ka 1200 ngut kawei kawei ka polling station la kyntu ïa ki ba kin pynbeit bha khnang ban pynsuk ïa ka jingthep vote bad ha ka jylla ki la don kumba 27 tylli kiba kum kine ki polling station.
“Nalor ka 27 tylli ki polling station, kumba 49 tylli ki polling station ba thymmai la mynjur da ka ECI naba katto katne ki Polling Station ki la jan poi kumba 1200, katto katne pat ki bynta ki kham shem jingeh na ka daw ka jinglong lum bad ka jingjngai ki jaka, bad kiwei pat ki daw kiba donkam ban hap pynsuk ïa kiba thep vote,” u la ong da kaba bynrap ba kumba 12 tylli ki PS la wengnoh na ka daw jong ka jingkyllum lang noh ïa ki kynthei bad shynrang ha kawei ka PS ban pynlong kum ka general PS hadien ba la dep ban pynbeit bha.
