Shillong, Risaw, 13: Ka seng kieng atiar Hynniewtrep National Liberation Council (HNLC) ba la shah khein beaiñ ka la shim jingkitkhlieh halor ka jingbuh ïa u bom IED hakhmat ka phyllaw iing jong u Bah Nehlang Lyngdoh ha Umsning, Ri Bhoi District.
Ha u kyrwoh ba la phah da u General Secretary ka HNLC Bah Saiñkupar Nongtraw sha ki lad pathai khubor ha ka Lah Sngi u Blei u la kam ba ka seng ka la leh ïa kane kum ka jingpyrshah ïa ka jingshet kylla ïa ka jaidbynriew da ki nongkhaii bad ki politishian bamsap kiba ai jaka rieh bad kiba pynkupbor ïa ki briew kiba nabar ka jylla.
“Ka HNLC ka pynmih ïa kane ka kyrwoh ban pynkynmaw ïa baroh ki nongmihkhmat kiba mynta bad kiba la jied mynshuwa ba ka jingshaniah jong ka Jaidbynriew kam dei ka kabu ban die ne khaii. Ka kamram jong uwei pa uwei u nongïalam ka long ban ïada ïa ka khyndew ka shyiap, ki marpoh khyndew, bad ka jinglong kyrpang jong ki briew jong ngi ban ym pynkhein ïa ki na ka bynta ka jingmyntoi shimet ne ka saiñ pyrthei,” la ong u kyrwoh.
“Ngi la peit bniah da ka jingsngewkhia kaba jur ba ki katto katne ki briew hapoh ka kynhun saiñ pyrthei ki dang ïai bteng ban pyndonkam bakla ïa ka kyrdan jong ki da kaba ai jaka sah ïa ki katto katne ki bym dei ki riewlum, ban pynsuk ïa ka jingpynkylla jaka, bad kyrshan ïa ki jingmyntoi nabar kiba buh jingma ïa ka lawei jong u Hynñiewtrep,” la kynnoh ka seng.
“Ka Jaidbynriew ka ïakynduh ïa ka jingma kaba khraw kaba dang ïai bteng, ka kynhun saiñ pyrthei kaba bamsap kaba die ïa ka khyndew ka shyiap, ki marpoh khyndew, bad ka jinglong kyrpang jong ngi na ka bynta ka jingkyrshan nabar. Kum kine ki jingshet kylla kim dei tang ki jingbymlah ki dei ki kam lehbein saiñpyrthei pyrshah ïa ki briew jong ngi bad ïa ki kpa tymmen jong ngi,” la bynrap u kyrwoh na ka HNLC.
“Ka HNLC ka iengskhem ban ïada ïa ka hok bad ïa ka burom u Hynniewtrep. Ngin sa pynpaw pyrthei ïa kawei pa kawei ka kam bamsap, ngin sa jer kyrteng bad pynjah burom ïa kito kiba ïatreilang bad ki briew kiba nabar, bad ngin pynthikna ba ki paidbah kin tip pura mano napdeng jong ki kiba la jied ïa ka jingrhah spah ban ïa ka jinglong ba ïaineh,” la ong ka seng.
Ka HNLC ka la ong ba ha u snem 2004, tang shi taiew shwa ka jingpynbthei bom ha them metor, ka la lah ban buh ïa u IED ha ophis jong u SP ha Shillong, khlem da pynbthei.
“Ka tnad Pulit ka la buhrieh ïa kane ka jingjia, namar ka jingsngewlehraiñ jong ki ba watla ngi treikam ha ka jaka kaba la pynkhreh bha, ngi dang pyni ïa ka jinglah ban rung tuh bad ban buh ïa ki tiar pynbthei. Ha u snem 2021, ngi la leh ïa kane kajuh ka kam ha Khliehriat Police Reserve, kaba la wanrah ïa ka jingïap hapdeng ki Pulit. Sa shisien pat, ki bor synshar ki la jied ban buhrieh ïa ka jingshisha na ki paidbah,” la kam ka HNLC.
“Kane ka long ka jingpynkynmaw kaba khatduh ba ka bor synshar ka dei ban don ïa ka tynrai ha ka mon jong ki paidbah, ym ha ka jingsngewbha jong ki briew kiba nabar. Kito kiba ïai bteng ban leh pyrshah ïa ka jingmyntoi jong ka Jaidbynriew kin duh noh ïa ka hok ban dawa nongïalam hapdeng ki briew jong ngi, bad ka HNLC ka don ïa ka bor shipai ban ïaleh pyrshah ïa kine ki politician kiba khwan myntoi shimet, khlem da khein la ki bat ne em ïa ka bor synshar,” la maham ka HNLC.
