Shillong, Risaw, 13: Ka Dorbar Elaka Shilliang Myntang ka la dawa ïa ki bor synshar jong ka West Jaiñtia Hills District ba kin pynbiang da ki bor pahara kiba khlaiñ khnang ba ki nongshong shnong jong ka shnong ka Lapangap kin ïoh ban leit ot ïa u kba shwa ka 15 tarik, Risaw, 2025.
Ka Dorbar Elaka Shilliangmyntang ka la pynpaw ïa kane ka jingdawa lyngba ka jingthoh ba la aiti ha u Deputy Commissioner jong ka West Jaiñtia Hills, ha u Superintendent of Police bad ha u Chief Executive Member jong ka Jaiñtia Hills Autonomous District Council ha ka 13 tarik Risaw 2025..
U Dolloi ka Elaka Shilliangmyntang u Bah K. Sariang, ula ong, ka por kaba mynta ka long kaba kongsan bha ban ot ïa u kba na ki lyngkha kba, hynrei ki nongshong shnong ki mad jingeh namar ka jingbym shngaiñ ka jingim haba ki thmu ban leit ot ïa u kba na ka jingshah pyndik ha ki jaidbynriew Karbi.
U Assistant Secretary Elaka Shilliangmyntang u Ma Shiborlang Lamare ula pyntip ba ki nongshong shnong jong ka Lapangap kila pynkhreh ban ot biang ïa u kba haka 16 bad 17 tarik mynta u bnai bad lada ka sorkar kam lah ban pynbiang ïa ki lad jingïada, ki nongshong shnong jong ka Elaka Shilliangmyntang ryngkat bad ki nongshong shnong jong ka Lapangap kim banse ban shim ïa ki lad jingïada kiba donkam, kynthup ban rah ïa ki tiar ïaleh kiba don laisen, ban ïada ïalade bad ïa ki jingthung jingtep jong ki bad kino kino ki jingma kiba lah ban jia, ka sorkar kan shim ïa ka jingkitkhlieh.
