Shillong, Risaw 22: Ka Khasi Students’ Union (KSU) South West Khasi Hills District ha ka sngi Balang ka la pan jingpynshai na u Deputy Commissioner jong ka South West Khasi Hills District u Bah Barnari Mawlong halor ka jingsuba ba ka Geological Survey of India (GSI) ka thmu ban leh ïa ka Geo-Scientific Investigation ha ka thaiñ Mawkyrwat hadien ba ka Sorkar India lyngba ka Ministry of Mines ka la ai ka jingmynjur.
Ki shnong ba la thmu leh ïa ka Geo-Scientific Investigation ki kynthup ïa ka Mawkyrwat, Mawten, Mawlangwir, Mawtle, Sakwang, Pyndensakwang, Nonglang, Wahsiej, Mawkyllung, Marshilong, Nongbah-Marshilong, Jakrem, bad Nongmawlein-Pawphlang.
U President ka KSU SWKHDU, Bah Forwardman Nongrem ha ka jingïakren bad ki lad pathai khubor u la kynnoh ba ka seng ka suba ba ka GSI kan leh ïa ka Comprehensive Environmental Impact Assessment kaba dei ka Pre-Mining Activity ban shu leh pyndep tang ka rukom hashwa ban sdang ïa ka jingksam ïa ka meirawew tang ban bud ïa ki National Guidelines katba kum ka Environment (Protection) Act, 1986 bad ki kyndon jong ka International Atomic Energy Agency (IAEA) bad ka World Nuclear Association (WNA) shwa ban tih ïa Uranium.
U la ong ba ka seng don ruh ïa ka jingartatien namarba ka Geological Survey of India (GSI) ka ju leh ïa ka jingpeit bniah ïa ki jaka ban wad ïa ki marpoh khyndew ne ïa Uranium ha kiwei ki jylla ka Ri India kum ha Maharashtra, ha Chattisgarh bad ha Sonbhadra District jong ka Jylla Uttar Pradesh.
U la bynrap ruh, katkum ki kot ki sla ba la lap da ka KSU, ka GSI ka thmu ban leh ïa ka Geological Mapping, Sample collection bad ka Pitting & Trenching kaba kynthup ïa ka jingtih kaba lah ban kot 10 mitar ne kham jylliew ïa kata kaba la wanrah ka jingartatien shikatdei eh.
Halor kane, ka KSU ka la kynthoh ïa ka GSI ka bym shym la ai jingtip kaba bniah ne ban batai bniah sha ki paitbah halor kane ka kam, khlem ka jingïasyllok ïa ki shnong bapher bapher ne ki paitbah hashwa ban ïaid shakhmat ïa ka jingwad bniah ne Field Survey jong ki.
“Kam shym la don ka jingpynshai ha kaba ïadei bad ka jingthmu jong kane ka jingwad bniah ba ki wan, kam shym la don ka jinglong kaba shai ne ban pyntip halor ki marpoh khyndew ba ki shim nuksa na ki shnong, kam shym la don ka jingpynshai ha kaba ïadei bad ka rukom leh bad ki rukom treikam ba ki leh ïa kane ka jingwad bniah bad ka GSI ka la wan ruh khlem ka jingtip jong ka Khasi Hills Autonomous District Council (KHADC),” la kynthoh u Bah Nongrem.
U la pyntip ruh ba u Deputy Commissioner u la kular ba un sa lum lang ïa ki Rangbah Shnong, ki sengbhalang bad kiwei kiwei ki kynhn ban phah pynshai ha ka GSI halor kane ka mat.
“Lada kane ka kam, ka dei ka Pre-Uranium Mining Activity hashwa ban khlong ïa u Uranium na ka thaiñ Domïasiat bad Mawthabah, ka KSU ka kren da kaba shai ba ngim lah ban ailad,” la maham u President ka KSU.
