Dawa ki Karbi ban kem ïa kiba pynïap ïa u Oriwel Timung
Shillong, Risaw, 22: Ki nongrep ka shnong Lapangap kiba la hiar sha ki pynthor ha ka sngi Balang ki la ïoh ban ot pyndep ïa u kba tang hapoh 11 hectare na ka jingïar kaba 53.74 hectare ki pynthor kba kiba don shajan ka shnong Tahpat.
Ka ot kba ki nongrep ha ka shnong Lapangap kan dang bteng sa ha kine ki khyndiat sngi ryngkat ka jingsynran lang jong ki bor Pulit bad ki bor synshar ka West Jaiñtia Hills District khnang ban ïada ïa ki nongrep na kino kino ki jingshah pyndik kiba lah ban jia ha ka por ka bym poi pyrkhat.
U Superintendent of Police ka West Jaiñtia Hills u Jagpal Singh Dhanoa ha ka jingïakren bad ki lad pathai khubor u la ïathuh ba ki bor synshar district ki hap ban bud ruh ïa ki kyndon ba la buh da ki bor synshar jong ka West Karbi Anglong District, Assam watla ki don ha kane ka shnong ban ai jingïada ïa ki nongrep kba leit ot ïa u kba.
Ïa ki nongrep ka Lapangap la synran lang da ki dkhot ka KSU bad ka FKJGP
West Jaiñtia Hills District kiba la ïarap ruh ban ot bad ban kit ïa u kba sha ki kali ba la pynap lypa.
Ka Hill Farmers Union (HFU) ha u kyrwoh ka la khot bad wer ïa ki paidbah na kylleng ki shnong ban hiar lang sha ka shnong Lapangap ban ïarap ot ïa u kba uba dang don ha ki pynthor kba ha ka shnong Lapangap namarba u jyntang kba u la sdang ban tlor na ka daw ba u la ih.
Mynta ka step, ka la don ka jingïalang hapdeng u Rangbah Shnong jong ka Tahpat u Olingsun Timung bad u Waheh Shnong jong ka Lapangap u Bah Deimonmi Lyngdoh, ki nongïalam na Karbi Anglong ha ryngkat ka Socheng Amreng Border Development Committee bad la sakhi ïa kane ka jingïalang da ki bor synshar jong ka West Karbi Anglong District bad West Jaiñtia Hills District.
Ha kane ka jingïalang ki nongïalam ka West Karbi Anglong District ki la buh ruh da ka kyndon ba dawa ba dei ban kem ïa ki briew kiba donkti ban pynïap ïa uwei u Karbi uba la tip kyrteng kum u Oriwel Timung na ka shnong Tahpat bad dei ban pynsted ruh ïa ka jingtohkit halor ka jingïap jong u.
Ki Karbi ki la buh kyndon ba lada ym kem, ka eh ban wanrah jingsuk bad kane kan pynthut ïa ka rep ka riang.
Ki la ïa rai lang ruh ba ki nongshong shnong ka Tahpat kin ym tuklar satia ïa ka kam pud kam sam hapdeng ka Meghalaya bad Assam bad kane kan shong ha ki ar tylli ki sorkar.
Ki la rai ruh ba dei ban shah ïa ka jingthung tynrai dieng bad ka rep ka riang bad kumjuh ruh ban ïalam ïa ki masi sha jaka rep bad ïa kane hap ban ïa pyntip mar kylliang ban ym mih ka jingïasngewthuh bakla.
Yn shah ïa ki nongrep ka Lapangap ban ot ïa u kba jong ki naduh ka 22 tarik, Risaw 2025 bad ki ar shnong ki dei ban sngewthuh jingmut hapdeng jong ki ban pynneh ïa ka shongsuk shongsaiñ.
