Shillong, Risaw, 28: Ka Khasi Students Union (KSU) South West Khasi Hills District ha ka sngi Baar ka la rakhe ïa ka sngi pyrshah uranium ne Anti-Uranium Day ha Domïasiat, South West Khasi Hills District da kaba kynmaw burom ïa ka lyngkhuh sngi ïap ba la kynjoh san snem jong i mei ieit Spility Lyngdoh Langrin iba la ieng pyrshah ïa ka Sorkar India bad ïa ka Uranium Corporation of India Limited (UCIL) tad haduh ka sngi ka jingïap.
Ka KSU ka ju rakhe ïa ka sngi pyrshah Uranium ha rilum Khasi ha ka 28 tarik u Risaw manla u snem ban kynmaw burom ïa i mei ieit Spelity.
Ha kane ka sngi, ka KSU ka la pynlong ïa ka jingteh banner ha kylleng ki bynta jong ka South West Khasi Hills District kynthup ïa ka Mawkyrwat, Umdohlun bad Wahkaji ban kynmaw burom ïa i Mei-ieit Spility bad ban phah ruh ïa ka khubor kaba shai sha ka UCIL bad Sorkar India bad da lei lei ban ym ailad ban tih Uranium wat lada ki dkhot ka seng ki hap ban mad ïa ka jingïap.
U samla Biangbor Paliar, Vice President ka KSU CEC haba ai jingkren u la pynpaw ïa ka jingsngewkmen ba ki ka iing ka sem jong i Mei-ieit Spility ka dang skhem bad ka la nang skhem ban ieng pyrshah ïa ka jingtih Uranium ha kane ka thaiñ.
U la ong ruh ba watla ka Sorkar India ka la pynmih ïa ka Office Memorandum, ba ym donkam shuh ïa ka jingbiahar paitbah hashwa ban tih Uranium, hynrei ka seng ka kren shai ba da lei lei jia katba jia bad long katba long, ngin ym ailad da lei lei ban tih Uranium.
Ki nongkren ha kane ka sngi samla Pynshai Rani, Information & Publicity Secretary KSU CEC, samla Streamly Suchen, President KSU East Jaintia Hills District, samla Franklin Syiemiong, GS KSU West Khasi Hills District bad u Samla Forwardman Nongrem uba dei u President ka KSU SWKHD.
