Shillong, Naiwieng 04: Kum shi bynta ban wanrah ïa ka jingkylla ha ka saiñ hima sima, ki Nongïalam ba hakhmat na kylleng ki Jylla jong kane ka thaiñ Shatei Lam Mihngi ka India ki la ïasnohkti lang ban pynbna ïa ka jingpynkha ïa kawei ka rynsan ïatreilang ki seng riewlum hapoh ka lama “One North East”.
Kane kane dei ka sienjam kaba la shim ban wanrah lang ha kawei ka rynsan ïa ki sur bapher bapher jong ka thaiñ hapoh kawei ka seng sain pyrthei ka ban lah mihkhmat shisha katkum ka jingangnud jong ki paidbah jong ka bad ki jylla kane ka thain shatei lammihngi.
Ïa kane la pynbna ha New Delhi lyngba u kyrwoh ba la ïasoi lang da u Conrad K Sangma, Myntri Rangbah ka Meghalaya bad National President ka National People’s Party (NPP), u Pradyot Bikram Manikya, Nongseng ka TIPRA Motha Party, u Mmhonlumo Kikon, Nongaiktien barim ka BJP bad Myntri Sorkar na Nagaland bad u Daniel Langthasa, Nongseng jong ka People’s Party, Assam.
Katkum ka kyrwoh la ong, “Lah slem bha, ngi, ki nongïalam kane ka juk mynta jong ka thaiñ Shatei Lam Mihngi, ngi la kren ïa ki juh ki mat bad jingsngewkhia jong ki briew jong ngi na ki rynsan bapher bapher. Ngi la shemphang ba ka bor jong ngi ka shong eh ha ka jingïatylli, bad ka por ka la dei ban ai sha ki briew jong ngi ïa kawei ka sur jong baroh lang.”
Ki la bynrap ba kane ka kynhun thymmai kan shim ïa ka jingai mynsiem na ki jingïohi jngai bad ka nam jong ki Nongïalam ka thaiñ kiba la leit noh, kiba la ïakhun na ka bynta ka jingithuh kyrpang bad ka roi ka par jong ka thaiñ Shatei Lam Mihngi.
Laong ba kum ka sienjam ba hap leh kyrkieh, yn sa thaw ïa ka Committee ka ban shong pyrkhat bad ïakren halor ki kam kiba dei ban leh, kynthup ki rukom treikam bad ka rukom long jong kane ka seng saiñ pyrthei ba tyrwa ban thaw.
Ka kyrwoh ka ong, “Ka jingpyrshang ïatylli jong ngi ka dei kaba la ïalam lynti da kawei ka jingngeit – ba ki briew jong ka thaiñ Shatei Lam Mihngi ki dei hok ban ïoh ïa ka jingshah skhor, burom bad mihkhmat lyngba ka sur saiñ pyrthei kaba khlaiñ, kaba ïatylli ha ka ri.”
Shuh shuh ka kyrwoh ka ong, “Ngi la rai ban ïatreilang ha ka ban pynkha ïa ka seng saiñ pyrthei ba kyrpang na ka bynta ka thaiñ Shatei Lam Mihngi. Ngi la thaw ïa ka Committee bad kan sa aiti ïa ka kaiphod hapoh kine ki 45 sngi ban wan. Ngi wan hangne ym ban ïakhun pyrshah ïa kiwei ki seng saiñ pyrthei- ka jingpynleit jingmut ba hakhmat eh jong ngi ka long ïa ki briew ka thaiñ Shatei Lam Mihngi. Ka jingthmu ka long ban ai ïa kawei ka rynsan na ka bynta jong ki.”
Ka jingthaw ïa ka “One North East” la shim kum ka sienjam kaba kongsan ban sei ïa ki nongïalam na ka thaiñ bad ban wanrah ïa ka sur kaba khlaiñ ha ka saiñ hima sima na ka bynta ki phra tylli ki Jylla ka thaiñ Shatei Lam Mihngi ha ki rynsan jong ka Ri bad kumjuh ruh jong kiwei ki ri.
