Shillong, Naiwieng, 05: Ïa ka met kaba sah jong u Syiem ka Hima Sohra u Pa’iem Freeman Sing Syiem la thang ha ka sngi balang ha ka kpep Thang Syiem kaba don ha Pomsohmen, Sohra.
Ha kane ka jingleit on thang ïa u Syiem ïa kaba la leh ha ka niam ka rukom kumba la thang ïa ki Syiem kiba mynshuwa, da ki phew hajar ngut ki khun ki hajar jong ka Hima Sohra ki la tuid ban leit on thang ïa u Syiem.
Ha ka por mynstep la rah ïa ka met u Syiem ha Lyngkhason na iing sah jong u sha ka ophis treikam jong ka Hima Sohra bad nangne la rah pat ïa ka met sha Maraikaphon ban pynlong ïa ka jinglehburom khatduh ha kaba ki la don ki kynrem ki lyndan kiba na kiwei ki Hima ba kynthup ïa u Syiem ka Hima Mylliem, u Syiem ka Hima Bhowal, u Lyngdoh uba wan mihkhmat ïa ka Hima Khyrim, u MLA u Bah Gavin Mylliem, ki MDC ba kynthup ïa u Bah Titos W Chyne, u Bah Powel Sohkhlet, u MDC ka Shella, ki ophisar Sorkar lem bad kiwei pat ki Bakhraw Batri jong ka Hima Sohra. Hangne la pynlong ïa ka shad Shangwiang na ka Raid Mawshuit, ka Phawar na ka shnong Mawkliaw, ka shad Mastieh ïa kaba la ïashim bynta da ki khun ki hajar ka Hima Sohra.
Hadien ba la pyndep ïa ka jinglehburom ha Maraikaphon, la rah ïa ka Lyngkhason da kaba ïaid kjat lyngba ka surok bah ter ter naduh Maraikaphon haduh ban da poi ha kpep ha Pomsohmen bad hangne ruh hadien ba la pyndep ïa ka niam ka rukom, ka shad ka mastieh kumba long ka rukom.
La ai ding sa u Syiem ba dang shu shah jied ka Hima Sohra u Pa’iem Mar-remdor Syiem.
Ki khun ki hajar jong ka Hima Sohra wat hapdeng ka jingsngewsih namar ka jingkhlad noh jong u Syiem hynrei ki la pynpaw pat ka jingsngewsarong ba ka Hima ka la lah ban pyndep ïa ka niam ka rukom bad ban thang ïa ka met u Syiem katkum ka kyrdan Syiem bad katkum ka niam ka rukom kaba la ju leh naduh ki por kiba mynshuwa ban pynneh pynsah ïa ka riti ka dustur jong ka Hima.
Kiba bun na ki khun ki hajar kiba la ïoh ban ïakren bad u nonglum khubor ka Batesi Tv ki la ïathuh ba kim pat ju ïohi mynno mynno ruh ïa ka jingthang Syiem hynrei ki shu ïohsngew tang ha ki khanapateng ba la ïathuh da ki longshuwa hynrei dei mynta ka sngi ka dei ka sngi kaba ki la sakhi hi dalade ïa ka thang Syiem ha kane ka jingkhlad jong u Pa’iem Freeman.
Ka jingthang Syiem ha Sohra ka la wan jia biang hadien 99 snem bad u Syiem uba khatduh eh uba la thang u dei u Roba Sing Syiem ha u snem 1926.
