Shillong, Naiwieng, 06: Ki Pulit kiba la synran ïa ki trok kit mar kiba mih na rilum Jaiñtia ban hiar sha jylla Assam ki la shah pakhang lynti ha ka step sngi Palei ha ki dkhot ka Meghalaya Commercial Truck Owners and Driver’s Association (MCTO&DA) kiba pynlong ïa ka jingïakhih ha surokbah ka shnong Mawryngkneng, East Khasi Hills District.
Namar ka jingbym ailad jong ki nongïakhih, ki Pulit ki la hap ban pynbthei da ki stunt grenade khnang ban pynpra ïa ki nongïakhih.
Ki dkhot ka MCTO&DA ha ka jingïakren bad ki lad pathai khubor ki la kynnoh ba ki Pulit ki la pynibor ïa ki nongïakhih da kaba kawut lathi bad pynbthei da ki stunt grenade.
Katto katne ngut ki longkmie kiba shong dukan ha shilynter ka surokbah ha Mawryngkneng ki la bitar shla ïa ka jingpynbthei stunt grenade jong ki Pulit bad kynnoh ruh ba kane ka jingleh jong ki Pulit ka la pyntieng pynsmiej ïa ki khun ki kti.
Ki longkmie kiba la mih sha surok ki la beh ruh ïa ki Pulit na surok Mawryngkneng kat haduh ba ki Pulit ki la hap ban mih da kaba suk na ka shnong Mawryngkneng ban leit phai noh sha la ktem.
Ki paidbah katba ki dang beh ïa ki Pulit, ki la pyrta shla, “leit sha Langpih, leit sha Lapangap.”
Ki longkmie kiba dap da ka jingbitar shla ki la ong, “ki khun ha ïing tang shu khie thiah ki ïam, tang ban shong ban bam bam dih kim nud shuh. Nga kum ka kmie nga dap da ka jingpait ka dohnud ban ïohi ïa ka jingleh ki Pulit katne. Balei ki Pulit ki leh sat haduh katne ïa ngi. La long kumba ngi, ngi leh kam bymman. Ki phah da ki phew ngut ki Pulit, da ki SOT bad ki CRPF. Hato ma ngi ki nongshong shnong ngi dei ki nongdie drok, ki nonglute ne ki lehnoh ba ki leh haduh katne.”
“Hynne mynstep katba nga dang ïohthiah ba ngi la shong dukan baroh shimet, ngim kynmaw bha ïa ka por, ki wan kynsan ki Pulit nangtai bad ki SOT ki ïa beh kali hangne bad ynda ki la pyllait kali kine ki bapli (nongñiah trok dkhot ka MCTO&DA) ha kata ka por ki phah pynphai ïa ka kali. Tang shu phah pynphai ïa ka kali, ki (Pulit) ki sei da ki tear gas, ki sei da ki lathi. Ngi la ong wat pynbthei tear gas hajan iing hynrei kim ngeit ïa ka jingkyrpad jong ngi ki riewkynthei, ki riewpaidbah. Mar mar ki shu wan ban pynbthei ïa u tear gas, ma nga kaba nyngkong ban shitom tang ban bam ruh ngam lah shuh namarba ka shadem ka la set ba la rung ka lyer tear gas,” la bynrap sa kawei pat ka longkmie.
Ka la kynnoh ruh ba ki Pulit ha ka miet shiteng synñia 5 tarik, Naiwieng, ki la sei ïa ki briew kiba don hapoh dukan ban tied ban bom. “Mano ba leh ïa kata, dei sa tang uba nalor uba tip kham bha,” ka la ong bad bynrap, “balei ki Pulit ki wan leh thombor haduh katne katne. Nangno ki ïoh hukum,” la buh jingkylli kane ka longkmie.
“Haba ka dei tang ka jingïakhih pyrshah ïa ki karkhana pynmih dewbilat balei ki wan pyndik ïa ngi ki nongshong shnong kat haduh ba ki nongshong shnong kim ïoh thiah shuh miet la bad sngi. Kaei kata ka jingmut jong ki. Ki ladei ki nongpynïap briew kim dei shuh tang ki riewkhlaw. Ki la long kum ka mynsiem mrad, hangne ki wan pynbthei tear gas,” la kren bitar ka longkmie.
