Shillong, Naiwieng, 07: Ka Hynniewtrep Integrated Territoarial Organisation (HITO) ka la byrngem ban pynlong ïa ka jingïakhih ha Secretariat lada ka Sorkar Jylla kam pyllait ïa ki nongïalam jong ka Meghalaya Commercial Trucks Owners and Drivers Association (MCTODA) kiba la shah kem ha ka por ba la pynlong ïa ka jingïakhih ha Mawryngkneng, East Khasi Hills District ban pynphai ïa ki trok jong ki karkhana shna dewbilat ha ka miet synnia ka 5 tarik mynta u bnai.
U President ka HITO Bah Donbok Dkhar ha ka jingïakren bad ki lad pathai khubor ha ka jingleit jngoh ïa ki nongniah bad ki trai trok ha Mawryngkneng u la ong, “lada phim pyllait ïa ki nongïalam jong ka MCTODA ngim banse ban sa leit ïakhih ha ing lajong, kata, ha Secretariat, namarba ïa ka Secretariat la shna da ka pisa jong ngi u paidbah. Hangta ngin sa pyni ïa ka jingshisha. Phi kwah ba ngin wan ha iing, ngin wan, ngin synran ma ngi, pynbeit ma phi.”
“Pynheh noh ïa ka phatok lada phi kwah ba ngin ïakhih, lada phi kwah ban pynbeit, pyllait noh (ïa ki nongïalam khlem da teh kyndon) bad pynbeit noh ïa kane ka kam mardor katkum ka Notification ba phi la shna,” u la bynrap.
“Ka jingdawa hi ieh beit ha ka jingstad jong ki nongïalam ba kin dawa ba dei ban pyllait ïa ki nongïalam khlem da buh kyndon namarba ki khlem leh ïa ka kam beaiñ hynrei ki leh katkum ka jingpynbna (Notification). Mano ba shna ïa ka jingpynbna, dei ka Sorkar, mano ba pynshlur dei ka Sorkar,” u la ong.
Haba kynthoh ïa ka NPP kaba ïalam ïa ka Sorkar Jylla, u Bah Dkhar u la ong, “lada ki pharia ïa ka jaidbynriew da kaba ki ong ka East Jaiñtia Hills, ka West Jaiñtia Hill, balei pat phi dang leit shim ïa kato ka T.50 lak na ka bynta ka NPP. Kata ka karkhana dewbilat kam dei seh na East Jaiñtia Hills, balei phi leit shim ïa ka pisa jong ka East Jaiñtia Hills, phi ladei ban kyrngah em. Wat nym pharia ka jaidbynriew. Ngi ngin ym sngewthynnat da leilei ruh. Tang na ka bynta ka jingmyntoi saiñpyrthei jong phi ngim nym biang. Ka jaidbynriew Hynñiewtrep ngi long kiba ïa tylli kawei.”
“Lada ka poi kano kano ka jingtynjuh, tang shu ktah ïa ki karkhana pynmih dewbilat ka don beit ka jingshoh ka jingbom. Ngi la peit ïa ka nuksa ha ka Public Hearing jong ka Top Cement ruh ki (paidbah) ki shah bom. Kaei kane, tang shu ktah ïa kine (karkhana pynmih dewbilat),” la kynthoh u President ka HITO.
“Nga pynksan ïa ka jingïakhih jong phi ki nongniah trok ba ka long kaba don nongrim bad kaba long aiñ. Jin lada phi leit (ujor) ha Iingbishar, ka sorkar ka la rem lypa, katkum ka Notification),” u la ong shuh shuh.
Da kaba kynthoh ïa ka jingbym siew ryntih ki karkhana pynmih dewbilat ïa ka bai kit nong, u President ka HITO u la ong, “balei ka Sorkar kam pynshai ïa ka dor kit sha ki nongniah trok jong ki seng bapher bapher bad phi pynshai tang ïa ki katto katne ki seng. Katkum ki lad pathai khubor ngi ïohi ba ka don shisha ka High Level bad ka don shisha ka jingïasam slip tang hapdeng ki katto katne.”
