Shillong, Naiwieng, 08: Ki dkhot jong ka Meghalaya Commercial Trucks Owners and Drivers Association (MCTODA) kim pat lah satia ban shim rai la kin pynkut noh ne kin dang bteng ïa ka jingïakhih ba khlem pud sngi pyrshah ïa ki karkhana pynmih dewbilat kiba don ha East Jaiñtia Hills District.
Kum ban shu pynkynmaw, ha ka miet shiteng synñia ka 5 tarik mynt a u bnai ki Pulit ki la kem ïa u President ka MCTODA Central Body u Bah Mokslander Marngar, ïa u President ka MCTODA Jaiñtia Hills Unit Bah Heibor Pariat bad katto katne ngut ki nongïalam hadien ba ki la pakhang lynti ïa ki trok ha surokbah Mawryngkneng katba ka jingïakhih ba khlem pud sngi ka dang ïaid shakhmat.
Kane ka jingbym lah jong ki dkhot ka MCOTDA ban shim ïa ka rai ka long hadien ka jingïakynduh ïa u Symbud Myntri Rangbah ka Jylla uba khmih ïa ka tnat Transports Bah Sniawbhalang Dhar ha ka sngi Thohdieng khlem da don lang ki nongïalam kiba dang shah set along hadien ka jingshah kem ha ka miet shiteng synnia ka 5 tarik mynta u bnai.
“Ngi la rai ban ap haduh ka Lah Sngi u Blei na ka bynta ba kin pyllait noh ïa ki nongïalam jong ngi shwa ba ngin shim rai kumno ban leh nangne shakhmat. Ka jingïakhih kan dang bteng,” ong u Bah Lumlang Mawnai u dkhot jong ka MCTODA ha ka jingïakren bad ki lad pathai khubor hadien ka jingïalang hapdeng ki dkhot ka seng bad u Symbud Myntri Rangbah kiba dang pynlong ïa ka jingïakhih ba khlem pud sngi ha ka shnong Mawrynkneng, East Khasi Hills District.
“Ngi la kyrpad ïa ka Sorkar Jylla ba kan pyllait mardor ki President jong ngi bad ïa kiwei kiwei ki nongïalam bad ïa ki dkhot khnang ba kan ym don shuh kano kano ka jingpynwit ïa ka leit ka wan jong ki trok kit mar,” u la bynrap.
Haba kylli, u Bah Mawnai u la ïathuh ba u Symbud Myntri Rangbah ha ka jingïalang kaba la long ha ka por mynsngi u la kular ban wad ïa ki lad ki lynti khnang ban ïoh pyllait noh ïa ki nongïalam na along. U Bah Bah Dhar u la kular ba un sa pynlong biang sa kawei ka jingïalang hadien ba la pyllait along ïa ki President ban ïakren ïa ka mat kaba ïadei bad ki karkhana pynmih dewbilat.
Hynrei u Bah Mawnai u la ong ba ka seng kam lah satia ban shim ïa ka rai ban pynkut noh ïa ka jingïakhih namarba bun ruh na ki dkhot ka seng kim don lang.
“Lada ngi dang ïai bteng ïa ka jingïakhih ruh, ngin pynthikna ba ka jingïakhih kan long kaba jaijai,” la ong u Bah Mawnai.
