Shillong, Naiwieng, 08: Ka jingbym don ki lynti ïaid kjat ha ki shnong ka East Jaiñtia Hills District kiba ka surokbah National Highway-6 ka ïaid lyngba ka la pynsyier mynsiem ïa ki nongleit nongwan.
U Bah Happydong Jungai na ka shnong Rattacherra, East Jaiñtia Hills District ha ka jingthoh ba la phah sha u Deputy Commissioner jong ka East Jaiñtia Hills District u la ujor halor ka jingjur shaba palat ka jingmih u pum pum bad ka jingbym don ki lynti ïaid kjat ha shilynter ka surok National Highway-6 naduh Jowai shaduh Ratacherra.
Ha ka dorkhas, ba u Bah Jungai u la phah ruh ïa ki dur ki dar kum ki sakhi, u la ong ha kiba bun ki bynta jong kane ka surokbah la shna ïa ka surok da ka dewbilat bad namar ka jingbym shna bha ka surok ka pynmih ïa u pum pum uba ktah haduh katta katta ïa ka koit ka khiah jong ki nongshong shnong, ki khynnah skul bad ïa ki nongleit jingleit kiba hap ban ïaid na ka surokbah manla ka sngi.
“Bun tylli ki shnong kiba ka surokbah ka ïaid lyngba kim don ïa ki lynti ïaid kjat jong ki paidbah nongleit nongwan. Kane ka la pynsyier mynsiem bad ka la buh jingma ruh ïa ka leit ka wan bad ïa ka ïaid ka ïeng jong ki nongshong shnong, ki khynnah skul bad khamtam eh ki riewtymmen ki bym banse ban ïaid ha ka surokbah kaba ki kali heh ki ïaid lynti,” u la ong.
“Namarkata, nga kyrpad ïa ki bor ba dei peit/ïa ki kontraktor ba kin shimkhia mardor ban pynduna ïa ka jingmih u pum pum ha surokbah. Ban pynthikna ba dei ban shna ïa ki lynti ïaid kjat ha ki shnong kiba don naduh Jowai ter ter shaduh Rattacherra jong ka surokbah National Highway-6 khnang ban ïada ïa ka leit ka wan jong jong ki paidbah. Nga kyrmen ba phin shimkhia mardor ïa kane na ka bynta ka jingmyntoi jong ki paidbah,” la kyrpad u Bah Jungai ïa u Deputy Commissioner.
