Shillong, Naiwieng 08: Ka seng Congress ka la pynkhreh ban ïakhun ïa ka rai jong u Lamphang ka Ïingdorbar Thaw aiñ ka jylla u Thomas A Sangma halor ka jingkyntait jong u ïa ka jingkyrpad ban wengnoh ïa ki 4 ngut ki MLA kiba la leit ban pynïasoh sha ka seng National People’s Party (NPP) kaba don ha ka bor sorkar.
U President ka Party u Bah Vincent H Pala u la ong ba dangshen u Lamphang ka Ïingdorbar u la kyntait ïa kane ka jingkyrpad da kaba ai daw ba ka dei ka jingsoi jong ka jinglong dkhot ha ka party ym kum ki nongmihkhmat.
“U Lamphang u la kyntait ïa kane ka jingkyrpad da kaba ai daw ba tang ki MLA ne nongthaw aiñ ki lah ban soi ïa ka jingkyrpad,” ong u Bah Pala da kaba kam ba ka Supreme Court ka ai ka jingkyrshan ïa ka jingïeng jong ka seng, ha kaba shah ïa ki dkhot ka party ba kin soi ïa kum kane ka jingkyrpad.
“Ngi don ïa ka daw kaba biang bad ngin ïakhun ptyrshah ïa kane ka rai jong u Lamphang,” ong u Bah Pala, da kaba bynrap ba u nongsaid aiñ jong ka party u la pynkhreh ïa ka jingkyrpad ban leit aiti sha ka Meghalaya High Court hapoh kane ka taïew.
Lah ban ong ba ha ka 28 tarik u Nailar, u secretary ka Meghalaya Pradesh Congress Committee (MPC) u Bah Manuel Badwar u la aiti ïa ka jingkyrpad sha u Lamphang halor ka nongrim ba kitei ki MLA ki la mih noh na ka seng khlem da ïoh ka jingbun paid kaba long kaba donkam katkum ka kyndon.
Ïa kane ka jingkyrpad la ujor hapoh ka Rule 6 jong ka Meghalaya Legislative Assembly (Disqualification on Ground of Defection) Rules, 1988, kaba pule bad ka para 2(1)(a) jong ka Tenth Schedule ka Constitution ka ri India, 1950.
Ïa kane ka rai la shim hadien ba u MLA ka Mylliem u Bah Ronnie V Lyngdoh u la iehnoh ïa ka seng Congress bad wengnoh ïa ka jingkyrpad ba la ujor hakhmat ka Meghalaya High Court pyrshah ïa ki 3 ngut ki MLA ba kynthup ïa u Celestine Lyngdoh na Umsning, u Bah Charles Marngar na Mawhati bad u Bah Gabriel Wahlang na Nongstoiñ.
Lah ban pynkynmaw ba u Bah Ronnie V Lyngdoh u la ïasoh bad ka NPP ha ka 30 tarik u Naitung katba kiwei pat ki la ïasoh sha ka NPP ha ka 19 tarik u Nailar, 2024.
Lah ruh ban ong ba u Lamphang u la ithuh ïa kane ka jingïasoh jong kine ki MLA sha ka NPP.
