Shillong, Naiwieng, 08: Ka Dorbar Shnong Urkaliar ka la ïoh ïa ki kor CCTV lyngba ka Shillong Smart City Project ban pyndait ha baroh kawei ka shnong khnang ban tem ïa ki kam runar ruser bad ban wanrah jingshngaiñ ïa ki nongshong shnong bad ïa ki nongleit nongwan lyngba kane ka shnong.
U Secretary jong ka Dorbar Shnong Urkaliar u Bah Samborlang Diengdoh u la pynpaw ka jingsngewnguh kaba khraw ïa ka Sorkar Jylla kaba la mang ban ai ïa ki kor CCTV lyngba ka Shillong Smart City Project ki ban pynsuk ïa ka dorbar shnong ban korbar ïa ki kam ki jam bad khamtam eh ban ïoh khmih bniah ïa ka jingdheng kali na ka jingpynïeng kali khlem akor jong ki nongñiah kali.
U la kyrpad ruh ïa ki nongñiah kali haba ki thied jingthied ki dei ba kin da pynïeng bha ïa ka kali jong ki ym ban shu pynïeng khlemakor kat haba sngewbit namarba ka pynthut ïa ki nongleit nongwan.
U la bthah ruh ïa ki nongdie jingdie hapoh u pud u sam jong ka shnong Urkaliar ba ki dei ban khang noh ïa ki dukan jong ki hapoh ka 11:00 baje mynmiet bad kumjuh ruh ïa ki kali kiba wan ïeng hapoh ka shnong hadien ka 11:00 baje mynmiet, ka dorbar shnong kan pynshitom katkum ki kyndon ba la bthah da ka Deputy Commissioner jong ka East Khasi Hills District.
