Shillong, Naiwieng 09: Kan long ka sngi ka ban sah jingkynmaw ha ka nguh ka dem blei ha u Lum Sohpetbneng ba la pynlong da ka Seng Khasi Kmie ha ka sngi U Blei namarba ha kane ka sngi ka Seng Khasi Kmie ryngkat ka jingsynrop lang ki 40 tylli ki Seng Khasi bad ki Seiñ Raij ki la lah ban pynieng ïa ki mawbynna sahnam ha kliar jong u Lum Sohpetbneng.
Kane ka jingpynieng ïa ki 40 tylli ki mawbynna ka long ruh kum shi bynta ka jingrakhe ïa ka jingdap 125 snem ka Seng Khasi Kmie ban pynneh pynsah ïa ka riti ka dustur, ka leh niam ka leh rukom tynrai bad kumjuh ruh ïa ka jinglong tynrai ki Khasi kiba dang bat dang ksoh ha la niam tynrai.
Ha kane ka sngi la sakhi lang da u Lat ka Jylla u CH Vijayashankar uba la kiew sha kliar u Lum Sohpetbneng ban sakhi ïa ka jingleh niam bad ka nguh ka dem blei ka Seng Khasi Kmie ha kliar jong u lum.
Nalor u Lat, la sakhi lang da u Symbud Myntri ka Jylla u Bah Prestone Tynsong, u Myntri ka tnad Arts and Culture u Bah Sanbor Shullai, u Dolloi ka Elaka Jowai u Bah Puramon Kynjing, u Syiem ka Hima Mylliem u Paiem Ainam Manik Syiem, ki tymmen ki san jong ka Seng Khasi Kmie ha ryngkat ki paid Khasi kiba dang bat dang ksah ha ka niam tynrai.
