Shillong, Naiwieng, 09: Ha kum kane ka juk kaba ki samla ki ïakynduh jingeh bha ha ka ïohkam ïohjam kat shaba ki phai, u MLA jong ka North Shillong Constituency Bah Adelbert Nongrum ryngkat ka jingïatreilang bad ka Meghalaya Social Development Society (MSDS) ki la ai da ki jinghikai pyntbit ba bun jait sha ki 100 ngut ki samla bad ki longkmie khnang ba kin dup lah ban ieng ha la ki jong ki kjat.
Hadien ba ki la pyndep ïa ka jingshah hikai pyntbit kaba hynriew bnai kynthih kaba la sdang naduh u bnai Jymmang, 2025 bad ïa kaba la pynkut ha u bnai Risaw, 2025 la sam pat ïa ki syrnot ha ka sngi Saitjaiñ ha ka jingïalang kaba la long ha ka Dorbar Hall jong ka shnong Lawmali,Shillong.
Ha kane ka sngi u MLA ka North Shillong Constituency u Bah Adelbert Nongrum u la long kum u kongsan ryngkat ka jingdonlang jong ki Rangbah Shnong na ki shnong bapher bapher kiba hap hapoh ka jylli jong ka North Shillong Constituency lem bad ki samla kynthup ruh ki longkmie kiba la pyndep ïa ka jingïoh jinghikai ha ka Food Processing, Tailoring bad Embroidery, Beatucian, Mushroom, Bakery, Electrical bad Computer.
Ïa kane ka jingai jinghikai ba khlem donkam ban siew eiei, la pynbit pynbiang hi da u Bah Adelbert Nongrum lyngba ka MLA scheme kaba kot T. 5.21 lak.
Haba kren ha ka jingïalang kum u kongsan u Bah Nongrum u la ong, “kum u nongmihkhmat na ka Constituency kaba don ruh ïa kiwei pat ki jaidbynriew ki bym dei ki riewlum nga ju pyrshang borabor ban ai mar katjuh la ka long ha ki kam pynroi, bad ha kiwei kiwei ruh ki mat khnang ba ka Constituency kan dup kiew irat shaphang ha ki kam pynroi.”
“Bunsien ngi ïakren beit tang ïa ki kam pynroi hynrei ngi klet noh ïa ki kam kiba kyntiew ïa ki samla ha ki kam ki jam. Mynta ka la dei ka juk ban ïabeh sha ki kam sorkar ka la long kaba eh haduh katta katta,” u la ong.
“Ngim dei shuh ban dang shaniah ha kiwei mynta mynta ka la dei ka por ba ngi hap ban shaniah ha lade (ha ka sengkam sengjam),” la bynrap shuh shuh u Bah Nongrum.
