Shillong, November 11: Ka Chairperson jong ka Meghalaya State Commission for Protection of Child Rights, ka Kong Iamonlang Syiem, haba kren ha ka jingïalang Stakeholders’ Consultative kaba dei halor ka phang ba shah thombor pyrshah ïa ki longkmie bad ki khynnah kaba la long ha State Convention Centre ha ka sngi baar ba pynlong da ka tnat Social Welfare ka la pynpaw ïa ki jingeh kiba bun ba la mad da ki longkmie bad ki khynnah ha ka jylla.
Ha ka jingkren ka la pynpaw ruh ba ka Commission ka la ïohpdiang bun ki jingujor la ka dei ha ki kam ïing kam sem, ne ki longkmie kiba marwei ne kiba la shah kyntait.
Ka la pynpaw ruh ka jingsngewkhia ba bun na ki briew ki la kyntait ban ai ki jingsumar da kaba ai ïa ka daw jong ka jingbym donkam donjam bad kiwei kiwei, ha kaba kane ka la pynlong ïa ki longkmie bad ki khynnah ba kin mad ki jingeh.
Ka la banjur halor ka jingdonkam ban pynkupbor ïa ki longkmie bad kane kadei ban long lyngba ki jingpynsngewthuh paidbah bad ka la kyrpad ruh ïa ki longkmie ba kin shim ïa ka rai kaba biang haba ki mad ïa ki jingeh jong ki.
Ka Kong Iamonlang ka la ong ba ka jingshah thombor ha ïing ka dei ka jingpang kaba rieh ha ka imlang sahlang, da kaba kdew ruh ba bun na ki longkmie ki mad ïa kane ka jingpang kaba rieh. Ka la ong ruh ba bun na ki khynnah ki la mad bha ïa kane ka jingeh bad ka jinglong jingman.
Ka la ong ruh ba ym lah ban kyntait ba ka social media ka la leh ïa ka kam kaba biang ha kaba la ailad ïa ki longkmie ba kin mihshakhmat ban pynpaw ïa ki jingeh jong ki lyngba ka online.
Ka la ïathuh ruh ïa ki jingeh ba mad da ki longkmie ba kynthup ïa kawei ka longkmie kaba armet bad i khun ba la pun ba la shah thombor ha la u jong u kurim. Ka la kyntu ïa ka imlang sahlang ba kim dei ban sngapjar haba ki suba ba don kum ki jingjia shah thombor.
“Ka jingtuklar kan ïada ïa ka jingim,” ka la ong bad kyrpad ïa ki nongshong shnong ba ki dei ban pyntip ïa kine ki jingjia sha ki sengbhalang, sha ka Commission, bad ki helpline, ne sha ka tnat Social Welfare.
Ka Chairperson ka la pynpaw ruh ïa ka jingeh kaba mih na ka kam nongkynti ha kaba ki don na ki katto katne ki Rangbah Shnong bad ki nongïalam shnong ki pyndonkam bakla ïa ka bor ban thombor ïa ki longkmie.
Ka Kong Iamonlang ka la kdew ruh ïa ka jingkiew ki kam POSH (Prevention of Sexual Harassment at Workplace) cases, kiba la mad da ki longkmie ha ki jaka treikam, la ka dei ha ka bor pyrkhat ne ka met ruh kumjuh. Ka la ong ba na ka liang ka Commission ka la bteng ban trei na ka bynta ka bha ka miat jong ki longkmie ha kiba bun ki liang lyngba ka jingpynlong ïa ki awareness programme ha kaba ïadei bad kane kam.
