Shillong, Naiwieng, 12: Ka Congress ka la khot ban pynkupbor shuh shuh ïa ki Dorbar Shnong ha ki rukom pynrung kyrteng thep vote da kaba kdew ba kan ïarap ban khanglad ïa ka jingpynrung ïa ki nongthep vote ki bym dei hok bad ban pynthikna ïa ka thup kyrteng ki nongthep vote kan long kaba khuid ha ka jylla Meghalaya.
Haba kren sha ki lad pathai khubor ha ka sngi Balang, u secretary jong ka Meghalaya Pradesh Congress Committee (MPCC) u Bah Manuel Badwar u la ong, “ha ka jingïalang kaba la long dang shen ban ïakren ïa ka Special Intensive Revision (SIR)… namarba ngim don ïa ka rukom synshar Panchayati Raj hangne, ngi la ong ïa u Chief Electoral Officer ba u dei ban pynkubor ha ki Dorbar Shnong ha kaba ïadei bad ka jingpynrung kyrteng na ka bynta ki nongthep vote.”
Katkum ka jingong jong u, ïa kane ka jingai jingmut la kyrshan ruh da ki nongmihkhmat na kiwei pat ki party kiba la don lang ha ka jingïalang ba dei ban ithuh pura ïa ka iktiar jong ki Dorbar Shnong ha ki kyndon kiba ïadei bad ka jingpynrung kyrteng ïa ki nongthep vote.
U (CEO) u la kular ïa ngi ba un sa shim khia bha ban ai bor shuh shuh ïa ki Dorbar Shnong khnang ban pynthikna ban khanglad ïa ka jingwan rung tuh bad kumta ter ter bad ki nongthep vote ki bym dei hok kim dei shuh ban dang ïoh thep vote (ha Meghalaya),” ong u Bah Badwar.
U Bah Badwar u la pynpaw ruh ïa ki khep jong ki nongthep vote kiba la kynriah jaka ha kylleng ki jylla da kaba kdew ïa ki jingpeit bniah jong u Rahul Gandhi, ban ai jingmut ba kum kine ki rukom leh, kiba lah ban khring da ka “bor pisa,” ki lah ruh wat ban pynthut ïa ka jingïajied nongmihkhmat.
“Kumba phi la ïohi ha ka jingïakhih jong u Rahul Gandhi ruh, ki don shibun ki nongthep vote kiba la kynthih na kawei ka jaka sha kawei pat kumta kin thep vote ha Delhi mynta ka sngi bad hadien ar bnai kin thep vote sa ha Bihar bad hadien lai bnai kin thep vote sa ha Karnataka,” u la bynrap.
