Shillong, Naiwieng, 12: Ka Congress ka la pynpaw ba kam don jingma eiei na ka jingïatreilang ka National People’s Party (NPP) bad kiwei kiwei ki seng saiñ pyrthei hapoh ka thaiñ Shatei Lammihngi.
Haba kren ha ki lad pathai khubor ha ka sngi Balang, u Secretary ka Meghalaya Pradesh Congress Committee (MPCC) u Bah Manuel Badwar u la ong ba kam don kano kano ka jingma ïa ka party.
U la kynnoh ba ka sienjam ba la shim da ka NPP, ka pynpaw ïa ka jingbymlah na ka liang ka BJP da kaba ong, “kiba bun ki seng riewlum ki la sngewthuh ba kim poi shano shano ruh da kaba ïalong paralok bad ka BJP bad na ka bynta kata ki sngew ba ki hap ban thaw ïa ka kynhun kaba thymmai. La kata ka kynhun thymmai ka long kaba bha ne kaba sniew, ka por hi kan rai, ym ma ngi.”
Haba kylli, u la ong, “ïa mynta, nga tharai ba kam dei ka jingmut kaba bha…lada phi sdang da ka seng saiñpyrthei kaba thymmai phi donkam shi bun ka pisa, kaba bun hi kan wan na Meghalaya, bad ngam tharai ba ki paidbah ba bun balang ruh kin pdiang ïa kata,” u la ong shuh shuh.
