Shillong, Naiwieng, 13: U Myntri Rangbah ka Jylla u Conrad K Sangma ha ka sngi Palei u la ong ba ka jingkhynra jong ka National Investigation Agency (NIA) ha South Garo Hills ka dei shi bynta jong ka jingtohkit kaba bniah bad kaba ïadei bad ka jingbthei bom hajan Red Ford, Delhi dang shen.
“Ki jingtip kiba ngi la ïoh ki pyni ba ki jingkhynra ki dang jia ha ki jaka bapher bapher. Ka NIA ka dang pyrshang ban lum ïa ki jingtip kiba bniah, bad ka dei ka jingtohkit kaba dang ïaid shakhmat,” la ong u Sangma, da kaba bynrap ba kan long kaba “bym dei” ban ïakren ïa ki jingtip ba kyrpang namar ka dei ruh na ka bynta ka jingshngaiñ jong ka ri.
U la ong ruh ba ka Sorkar Jylla ka long kaba kloi ban ai ïa ka jingïatreilang kaba pura bad ka NIA halor kane.
“Ngi don hangne ban ïatreilang bad ki ha baroh ki liang, da kaba ai ïa kano kano ka jingïarap bad ka jingkyrshan kaba donkam. Ka kam ka long kaba khia bad ngi hap ban kiar na kaba ai ïa ki jingtip kiba bniah,” u la bynrap.
Haba la pynbor ban ïathuh hato ki jaka ba ka NIA ka la khynra ka dei neem ha South Garo Hills, u Conrad u la kyntait, da kaba pynpaw biang ba kan jingktah ïa ka jingshngaiñ.
“Ngam kwah ban pynthut ïa ka jingtohkit da kaba pynpaw ïa ki jingtip kiba bniah,” u la ong shuh shuh.
Ha kaba ïadei bad ka jingshngaiñ jong ka nongbah Shillong, u Conrad u la ong ba ka jinglong jingman ka long “kaba pher bak-ly-bak” bad bynrap ba ‘kam don kano kano ka daw ban don ka jingsheptieng.’
U la kyntait ruh ïa kano kano ka jingpynbna kaba kyrpang na ka bynta ka Meghalaya, da kaba kdew ba ka dei tang shi bynta na ka jingtohkit.
“Ki jingtohkit ki dang ïaid shakhmat bad ngan ym kren eiei palat ïa kaba donkam ban ïada ïa ka jingshngaiñ jong ka ri. Kam don eiei ban khuslai; ka dei ka bynta jong ka jingtohkit”, u la pynkut.
