Shillong, Naiwieng, 13: Ka Hynniewtrep Border Disputed Redressal Forum (HBDRF) ka la dawa ïa ka Sorkar Jylla ba kan ai jubab hapoh ar taiew la ka ithuh ne ka kyntait ïa ka Block-I.
Ha ka dorkhas ba la phah sha u Myntri Rangbah ka Jylla u Conrad K Sangma ha ka sngi Palei, u Chairman jong ka HBDRF u Bah Chandame Sungoh u la ong, “ngi la kyntu ïa ka Sorkar Meghalaya ban pyntip sha ka HBDRF hapoh ar taiew naduh ka sngi ba la ïoh pdiang ïa kane ka shithi kaei ka jubab ba ka don ban ai halor ka jingdawa ban ithuh ïa ka Block-I.”
“Ngi kyrmen ba ka Sorkar kan jubab bad kan shim khia ïa kane ka mat da ka jingkhuid, ka jingkitkhlieh bad na ka bynta ka bha ka miat jong ki paidbah kiba shong basah ha ki shnong kiba dang hap hapoh ka thaiñ Block-I,” u la bynrap.
Ka Forum ka la pynpaw ruh ïa ka jingsngewkhia wat hadien ba la phah bun sien ïa ki dorkhas bad shong jingïalang la bun sien hynrei ka Sorkar ka dang sngap jarjar ban ai jubab halor ka jingeh jong ki paidbah kiba sah ha ka thaiñ Block-I
Ha ka shithi ba la aiti sha u Myntri Rangbah halor ka ishu jong ka Block-I ha ka 1 tarik, Rymphang, 2024, bad ïa ka jingpyntip sha u Myntri Rangbah, ki Symbud Myntri Rangbah ba kynthup ïa u Bah Sniawbhalang Dhar bad u Bah Prestone Tynsong bad sha u Chief Secretary ha ka 25 tarik, Jylliew, 2025 pyrshah ïa ka jingleh bymhok jong ka Socheng Amreng Border Development Committee (SABDC) kaba la dawa ban rejistar ïa ka khyndew bad ban pynieng biang ïa ka khyrdop khrong khajna ha ka shnong Khanduli, ha ka jingïakynduh markhmat bad u Myntri Rangbah bad ki heh Ophisar ha ka 25 tarik, Jymmang, 2025 bad ka jingthoh ba la aiti lang ban ithuh ïa ki shnong kiba dang hap hapoh ka Elaka Labang Nangphyllut katkum ba la pynbna da ka Jaiñtia Hills Autonomous District Council (JHADC) ha ka 13 tarik, Nailar, 2025.
U la kynthoh ruh ba watla ka JHADC ka la ai Sanad ïa ki Waheh Shnong jong ki shnong kiba hap hapoh ka Elaka Labang Nangphyllut hynrei ki paidbah kim ïoh ïa ki EPIC, Aadhaar Card bad kiwei kiwei ki dulir na ka Sorkar namarba ka Sorkar haduh mynta ka shu sngap mynthi.
Ka Forum ka la kdew ruh ba ka ka jingbym jubab na ka Sorkar halor ka jingithuh ïa ka Block-I ka la pynbitar ïa ki paidbah kaba ktah pat ïa ka im ka ïap jong ki paidbah ha khappud.
“Watla ngi la pyrshang ban phah da ka jingthoh la bun sien, hynrei ka Sorkar kam shym la ai jubab. Ka jingsngap jar jong ka Sorkar halor kane ka mat kaba ktah ïa ki paidbah ha khappud ka long ka mat kaba sngewkhia bha, khamtam ha kaba ïadei bad ka jinglong jingma jong ki paidbah kiba shah ktah ha khappud,” la ong u Bah Sungoh.
