Shillong, Naiwieng, 14: Ka Kynhun Myntri jong ka Sorkar Jylla ha ka sngi Thohdieng ka la mynjur ban pynbeit thymmai ïa ka Rule 6 (d) jong ka Meghalaya Ministerial District Establishment Service Rules, 2017.
Da kane ka jingpynbeit thymmai, mynta yn sa lah ban thungkam pura 50 % ha ki post ba hap ha ka kyrdan Group-D ha ki ophis treikam na ka bynta ki Regular Casual Worker (RCW).
Ha ka jingïakren bad ki lad pathai khubor hadien ba la wai ka jingïalang, u Myntri ka Sorkar Jylla Bah Wailadmiki Shylla u la pynrhsai ba ka jingpynbeit thymmai ka la weng ïa ka jingeh kaba la slem bha kaba pynmih ïa ka jingkulmar jingmut na ka jingïatakhuh ki Office Memorandum (OM).
Ka OM ba la pynmih ha u snem 1996 ka kdew ba 50 % ka bhah na ka bynta ki Regular Casual Worker, katba ka OM jong u snem 2017 ka kdew ba baroh ki post ha ka kyrdan Group-D dei ban thung beit (Direct Recruitment).
“Ngi la shim da ka rai ban pyntreikam da ka OM kaba la pynmih ha u snem 1996,” la ong u Bah Shylla bad bynrap ba ka jingpynbeit thymmai ka long ruh katkum ka Rule bad ban pynthikna ba ka bhah kaba 50% ka dei ban treikam noh naduh mynta.
Ka Kynhun Myntri ka la mynjur ïa ka jingtyrwa ban thung biang sa shisien ïa u Justice Shivaji Pande kum u President jong ka Meghalaya State Consumer Dispute Redressal Commission (MSCDRC).
U Bah Shylla u la ong ba ka samoi treikam jong u Justice Pande kan kut noh ha ka 6 tarik, Nohprah, 2025, katkum ki kyndon ba la don lypa, u dang ibit ban bteng ïa ka kam na ka bynta kane ka samoi, hadien ba la kyntiew ïa ka rta haduh 67 snem.
Nalor kata, ka Kynhun Myntri ka la pynrung ruh ïa ki saw ngut ki dkhot jong ka Commission ba kynthup ïa u Major Unsambyntalang Nongsiej, u Rupa Paul Chaudhuri, Nelisa F. Kharshiing bad u Bijoy A. Sangma.
U Myntri u la pyntip ruh ba ka Kynhun Myntri ka la mynjur ïa ka service rules jong ka MSCDRC, khnang ba ka Commission kan dup lah ban thaw la ka jong ka Recruitment Board ban thungkam ïa ki nongtrei.
