Shillong, Naiwieng, 18: Ka Constitutional Rights Forum (CRF) ka la phah da ka jingthoh sha u Myntri Rangbah ka Jylla u Conrad K Sangma, da kaba kyrpad ïa ka Sorkar ba kan thep ha ka Website jong ka Sorkar ïa ka email address bad ïa u phone number jong ki Myntri Sorkar bad ïa ki khlieh jong ki tnat treikam.
Katkum ka jingsngew ka Forum, kane kan ïarap ban wanrah ïa ka jingpynïajan ïa ka jingtreikam bad ki riewpaidbah, khamtam ki paidbah kiba sah ha ki shnong nongkyndong bad kiba kham shitom ka leit ka wan.
“Ka Forum ka la kyrpad ïa u Myntri Rangbah ban bthah ïa ki tnat treikam ba kin thep bad ban pynthymmai ïa ki phone number jong ki Myntri bad ki khlieh jong ki tnat treikam ha ki website jong ka Sorkar,” la ong ka Forum ha ka sngi Baar.
Ka CRF ka la pynpaw ruh ba ki nongshong shnong ki shem shitom haduh katta katta ban leit ïakynduh ïa ki Myntri Sorkar bad ïa ki khlieh jong ki tnat treikam khamtam haba ki ïakynduh ïa ki jingeh, ban pynsngew ïa ki jingtyrwa ne ki jingkyrpad.
Ka jingbym don ka lad kaba pynsuk ka buh jingeh bha ban pynsngew sha ka Sorkar bad kane ka khanglad ïa ki nongshong shnong ban wad jingïarap.
Ka CRF ka la ban jur ba ka jingbuh ïa ki jingtip ba lah ban pynsngew ha ka Website Sorkar kan kyntiew ïa ka jinglah ban ïoh jubab kham kloi bad kan pynlong ïa ki bor synshar ban kham shimkhia ïa ki jingeh jong ki nongshong shnong.
Kane ka jingthmu ka ïadei bad ki nongrim jong ka jinglong khuid bad ka jingkitkhlieh kaba pynthikna ba ki nongshong shnong kin lah ban ïakynduh bha bad ka Sorkar.
