Shillong, Naiwieng, 19: U Symbud Myntri Rangbah ka jylla Bah Sniawbhalang Dhar ha ka sngi Balang u la leit jngoh ïa ki arngut ki samla pule ka North-Eastern Hill University (NEHU) kiba la shah sumar ha Intensive Care Unit (ICU), Nazareth Hospital hadien ba ki la shah tynrah ha kawei ka kali kaba la pynher stet bha hajan ka Gate-2 jong ka skulbah NEHU ha ka janmiet Lah Sngi u Blei.
U la pynbna ba ka Sorkar ka la rai ban pynthikna ïa ka jingsumar kaba pura na ka bynta ki a rngut ki samla pule, ka samla Daritngen Pohdukhei bad ka samla Stephanie Shadap.
“Ka dei ka jingjia kaba shyrkhei bad kaba sngewsih shibun”, la ong u Bah Dhar ha ka jingïakren bad ki lad pathai khubor.
“Ki bahaïing ki la pyntip sha ka Sorkar bad ka dei ka kamram jong ka Sorkar ban peit bniah ïa kane ka kam, khamtam haba ïadei bad ki samla jong ngi,” u la ong bad bynrap, “ïa mynta iwei na ki, i la tip briew katba iwei pat im pat tip briew.”
Haba kylli, u Bah Dhar u la ong, “ka Sorkar ka la rai ban lut nadong shadong ïa ka bai sumar ïa ki arngut ki samla pule.”
“Lada kim lah ban sumar hangne hapoh ar-lai sngi, ka Sorkar kan phah sha ki hospital shabar ka jylla,” u la bynrap.
U Symbud Myntri Rangbah u la pyntip ba ki Pulit ki la kem ïa u briew uba la shah kynnoh uba la tip kyrteng kum u Permen M. Sangma, u nongap pahara ka NEIGRIHMS uba donkti ha ka jingjia aksiden.
“Ki don ki kyndon bapher bapher bad ka aiñ kan leh ïa la ka jong ka kamram. Ngi shimkhia bha ïa kane ka jingjia na ka liang ka Sorkar,” u la ong haba pynpaw ïa ki jingduwai bad ka jingkyrshan jong ka Sorkar Jylla sha ki samla pule kiba mynsaw bad ïa ki bahaïing hasem jong ki.
Kane ka jingjia kaba shyrkhei ka la jia ha ka Gate No-2 ha ka janmiet jong ka Lah Sngi u Blei.
Ki pulit ki la register case hapoh ka Section 109 BNS kaba ïadei bad ka kyndon ba thmu pynïap pyrshah ïa u Sangma bad ka kaiphod jong ka Medical ka la pynpaw ba u Sangma u la buaid ha ka por ba la jia ka jingjia aksiden.
U SP ka East Khasi Hills u Bah Vivek Syiem u la banjur ba kane kam dei satia ka jingjia ba malu mala bad donkam ban tohkit bniah khnang ban tip ïa ki jinglong jingman kiba don ha kane ka jingjia.
Ha ki dur CCTV, la pyni ba ka kali, ka ïaid stet bad tur sha ki arngut ki samla pule kiba ïaid dang ha surok hapoh ka phyllaw jong ka skulbah NEHU. Shwa ïa kata, ka kali ka la tynrah nyngkong ïa kawei ka Scooty bad nangta ka la tynrah sa ïa ka khyrdop.
