Shillong, Naiwieng 20 : U Symbud Myntri Rangbah ka Jylla, Bah Sniawbhlang Dhar ha ka sngi Palei u la ong ba ka sorkar ka dang pynkhreh mynta ban khot tender biang na ka bynta ka jingpynheh ia ka Shillong Airport kaba la ap khmih lynti la slem bha.
“Ngi don mynta ha ka jingpynkhreh ban khot tender biang. Kumta tang shu dep bhah ia ka tender ka kam kan sa sdang noh. Khmih lynti la kumno kumno mynt au snem hi,” ong u Symbud Myntri Rangbah haba kren bad ki lad pathai khubor.
U la iathuh ruh ba ia ka tender kaba rim la hap ban pynsangeh noh shwa hadien ba ka la don ka jingthut kumta mynta ki la pynkhreh biang da tender kaba thymmai.
La iathuh ruh ba katkum ki kyndon ba la buh da ka Airports Authority of India (AAI), uba lah ban khliehdor un ïoh por 18 bnai naduh ka tarik ba ai ia ka work order ban pyndep ia ka projek.
“Ka kyndon kaba ki pyntip shangi ka long ba naduh ka tarik ba ai ia ka work order, ka por ban pyndep kan long 18 bnai,” la bynrap shuh shuh u Bah Sniawbhalang.
Ka jingpynheh ia ka kad liengsuin kaba la mang ha ka jinglut kaba kot sha ka 119.44 klur tyngka ka kynthup ia ka runway kaba jrong 571mitar kaban long lang iaka jingjrong kaba 2,400 mitar bad kane kan plie lad ia ki liengsuin kiba heh kium ka A-320 ban noh khyndew.
Haba kren pat halor ka Baljek Airport, u Symbud Myntri Rangbah u la ong ba ka jingleit jurip lang hapdeng ka sorkar Meghalaya bad ka Aiports Authority of India ka dang sahteng ban peit bad shimti ia ka jaka ba donkam shuh.
“Ngi dang ap mynta ia ka jingleit ban jurip lang, ngi donkam ia ki riewshemphang na ka AAI ban wan bad kdew lang ia ka jaka kaba iahap ha shwa ba ngin shimti ia ka jaka,” u la ong.
