Shillong, Naiwieng, 20: Ka NEHU Teachers Association (NEHUTA) ka la dawa ïa ki bor pynïaid ka skulbah North Eastern Hill University (NEHU) ban weng mardor ïa ka ktem sah jong ki Security Guard ka Ranger Security and Services Orgnisation (RSSO) na ka jylli jong ka skulbah.
Ha ka jingïakren bad ki lad pathai khubor ha ka sngi Palei u President ka NEHUTA u Prof. Lakhon Kma u la pynrem jur ïa u Security Guard uba la tynrah ïa ki arngut ki samla pule ka Department of Chemistry, NEHU ha ka 17tarik Naiwieng, 2025 ka samla samla Darityngen Pohdukhei bad ka samla Stephanie kat haduh ba ki la mynsaw jur bad dang don mynta hapdeng ka jingshah sumar ha Nazareth Hospital, Shillong.
“Kumno u Security Guard uba trei ha NEIGRIHMS u wan sah hangne namarba ka don ka ktem sah jong ki hangne ha NEHU. Mano ba ai jingbit ïa ki ban shna ïa ka ktem hapoh ka Campus,” la buh jingkylli u Prof. Kma
U la kynnoh ba dei ka NEHU kaba hap siew lut ïa ka bai um, ka bai bording sha ka ktem sah jong ki Security Guard ka RSSO kaba don hapoh Campus.
“Hynrei katno ki siew pisa ïa ka NEHU ba la ailad ban don ruh ïa ka ktem,” u la ong.
“Jin lada kam don ka ktem sah, une u briew un ym wan hi ruh hapoh NEHU. Kan ym jia hi ruh ka aksiden. Namarba u dei na kajuh ka Security Agency, ha ka jingdih buaid, ka driving license ruh u Parman M. Sangma um don u shu tynrah beit. Ha kato ka sngi shu donbok ba duna briew. Kane ka Agency kam don eiei ban buh ktem hapoh ka Campus,” la ong u Prof. Kma.
“Kam dei hi ruh ka kamram jong ngi ban ai jaka sah ïa ki haba ngi la siew da ka pisa ban kin ai ka jingpahara ïa ngi,” u la ong shuh shuh.
“Haoid watla ka Agency ka la weng kam u, hynrei ka hap ban bah khlieh ruh ïa kane ka kam. Kumno ka Agency ka thungkam ïa kum kine ki briew ki bym tip ïa ka aiñ ka kanun, ka akor ka burom, dih kyiad katba mon, ka laisen ruh ym don. Balei ha ka por ba la thungkam ka Agency kam shym la kren shwa ïa ki. Hynrei kumba ka paw, ka Agency ka shu shim pisa bad ka klet noh ban ai jinghikai ïa kine ki briew ba la thungkam,” la kynthoh u Prof. Kma.
“Ngi la ïoh ujor na ki samla pule bad na ki nonghikai ba ym don Security eiei hapoh Campus. Mano ba rung mano mano ba mih bad wat ïa ki kali kiba rung ba mih ruh kim ju tohkit. Ki shu pahara tang kum ki nongap khyrdop ym shuh kum ki Security. Kum ïa kine ki Security ngim donkam. Ki dang bun ki Agency kiba kham lah ban treikam,” u la kynthoh shuh shuh.
U la ong ruh ba hapoh ka Campus la donkam ban buh ïa ki speed breaker bad wat sha surok ruh kumjuh khnang ban ïada na ka jingpynher stet shaba palat ki kali.
Shuh shuh u la ong ba ki bor pynïaid jong ka skulbah NEHU dei ban pyntreikam noh ïa ka rung ka mih ha Gate-1. “Ngi la rai ban dawa ban dei ban pyntreikam ïa ka Gate-1 hapoh shitaiew hynrei lym kumta ngin plie hi da lade,” la maham u President ka NEHUSU.
