Shillong, Naiwieng, 21: Ka Commissionerate of Food Safety, Meghalaya, ka la bthah ba dei ban weng noh ïa baroh ki mar ba la thoh kum ki “ORS Drink” lane ba la pyndonkam ïa ka kyntien “ORS” ha kano kano ka rukom thok na baroh ki dukan, ki dukan dawai bad ki clinic doktor kiba don ha ka jylla, kaba la pyntreikam hi mardor.
Ha ka jingpynbna paidbah ba la pynmih ha ka sngi Thohdieng, ka Deputy Commissioner (Food Safety) Kong DBS Mukhim ka la pynpaw ba ki nongdie Wholesale bad ki nongshalan mar ki dei ban pynphai mardor ïa kum kine ki mar sha ki nongshna ban buh dak biang katkum ki jingbthah jong ka FSSAI.
“Baroh ki Wholesaler/Distributor la bthah ba kin phah pynphai mardor ïa kine ki mar na ki nongdie mar ha ki ïew ki hat kynthup ïa ki Pharmacy bad ki Clinic Doktor bad ban phah ïa ki sha ki Kompani ba shna mar ban ai kyrteng biang katkum ki jingbthah jong ka FSSAI. La bthah ïa ki ban bud ryntih ïa ki kyndon treikam ba la buh. Ïa kane la leh bad la pyntreikam da baroh ki Designated Officers bad ki Food Safety Officers ha baroh kawei ka jylla,” ka la ong.
Kane ka jingleh ka long katkum ka jingbud ryntih ïa ka hukum pynshai jong ka FSSAI ha ka 15 tarik, Risaw, 2025 kaba ong ba kum kine ki jingdih ki dei kiba la shna thok bad ïalam bakla namarba kim ïahap bad ki kyndon jong ka Oral Rehydration Salts (ORS) katkum ka Food Safety & Standards Regulations.
Ka FSSAI ka la pynshai ba ka jingpynkhreh ïa u ORS ka dei ka jingpynkoit bad ym lah ban pynïaid iew ne die kum ka jingdih.
Kino kino ki mar ba la pyndonkam ïa ka kyntien ‘ORS’ ha ka jingthoh jong ka na ka bynta ka jingbam kyllum ka long kaba la shon kyrteng bakla bad kaba ïalam bakla bad dei ban weng noh na ki iew, ki dukan dawai bad ki Clinic doktor khlem da pynslem.
Ka Commissionerate ka la kyntu ban ai ïa ka jingïatreilang khnang ban ïada ïa ki paidbah na kaba shah ïalam bakla bad ki bym bud ïa ka kyndon ba la buh.
