Shillong, Naiwieng, 24: Ki Pulit kiba la ïoh jingtip na ka tnat syntiat ki la pynlong ïa ka jingpynap shrip ha ka Sngi u Blei hadien ba uwei u briew uba la tip kyrteng kum u Pynshngaiñ Kharkongor na ka shnong Lumdiengmet, Umpling, Shillong u la thmu ban aiti ïa u drok sha uwei u nongthied ha Umpling Lumdiengmet.
Katkum ka thymmei khubor ba la ïohlum, la ïathuh ba ki Pulit kiba la swait bha ïa ka leit ka wan jong u Pynshngaiñ Kharkongor ki la ïohi ba u don ha Umpling Lumdiengmet bad u dang shong hapoh ka kali Swift Dzire rong lieh kaba don ïa u nombar ML05-R-9778.
Hadien ba la wan poi ki nongsakhi, ki Pulit ka Anti -Narcotic Task Force (ANTF) ki la talasi ïa ka kali katkum ki kyndon jong ka aiñ bad ïoh kurup napoh kali ar tylli ki synduk thep sabon ba la thep ïa u drok herion bad ynda la leh test la pynthikna ba u dei shisha u drok heroin uba don ka jingkhia kaba 22.83 gram.
Ïa u Pynshngaiñ Kharkongor la rah noh da ki Pulit ka ANTF sha Rynjah Police Sation ban pynlong ïa ka jingtohkit bad ïa ka kali kynthup ïa u drok la kurup noh da ki Pulit.
Ki Pulit ki la register ïa ka case hapoh ki kyndon jong ka NDPS Act.
