Shillong, Naiwieng, 26: U Myntri Rangbah ka Jylla Conrad K Sangma ha ka sngi Balang u la pynbna ba ka Sorkar India ka la mynjur ïa ka song pisa kaba T.500 klur ban pynbiang bording ïa ki shnong bad ïa ki longïing kiba la shah kyntait mynshwa hapoh ka Revamped Distribution Sector Scheme (RDSS).
“Nga la pynsngew ha ka Sorkar India ha u snem 2022 ba ïa kito ki shnong bad ki longïing, kiba la shah kyntait bad ki bym shym la don bynta ha ka jingkheiñ briew ha ka por dei ban kynthup lang hynrei nga sngewkmen ban pyntip ba ka Sorkar India ka la mynjur ïa kata bad ka la mang pisa T. 500 klur ban kynthup (ïa ki),” la ong u Sangma ha ka jingïakren bad ki lad pathai khubor hadien ba la wai ka jingïalang Kynhun Myntri.
Katkum ka jingong jong u, kane kan pynbeit ïa ki jingduna na ka Khanasamari jong u snem 2011, kaba kynthup ïa ki jaka shong jaka sah kiba thymmai ki bym shym la shah kynthup ha ki snem ba ladep.
Ha ki por ba mynshuwa ki don ki skhim sorkar bapher bapher ha kaba la pynïoh bording ïa ki longïing bapher bapher bad ki shnong bapher bapher hynrei baroh kane ka jingpynïoh bording kaei kaba la jia ka long katkum ka thup bad ka jingkheiñ jingdiah ba la buh, kaba la rim bha kumba ka long ha u snem 2011 bad ki la don shibun ki longïing bad ki shnong kiba thymmai ki bym shym la shah kynthup lang. Katkum ka thup kyrteng, ki shnong kiba la shah kynthup hynrei ki shnong kiba thymmai bad ki longïing ba thymmai kiba la mih dang katto katne ki la shah ieh sharud,” u la ong.
