Shillong, Naiwieng, 26: Ka Federation of Khasi Jaiñtia & Garo People (FKJGP) Central Body ka la pynrem jur ïa ka jingleh jong ka Shillong Municipal Board (SMB) ban khanglad ïa ki nongdie sha kiba ïaid ban tyrwa sha bad jingbam ha ki bynta jong ka surok Police Bazar kiba dei ki trai ri trai muluk da kaba kam ba ki dei ban ïoh jingbit shwa na ka Municipal lyngba ki kot ki sla kiba biang.
“Katei ka jingleh jong ka Municipal ka long pyrshah ïa ka hok kamai jakpoh jong ki trai ri trai muluk namar ki barit baria kiba im sngi da kaba shu ïaid tyrwa sha kylleng kylleng ka long ka jingiuhroit bad ka jingthombor im im peit peit khlem kano kano ka jingsngewbriew,” la ong u kyrwoh ba la phah da u Vice-President ka FKJGP Central Body u samla Kitbok Nongphlang.
“Lada ka sorkar jylla ka don kano kano ka jingthmu na ka bynta ka bit ka biang jong ki paidbah ka la dei ban pyrkhat sani bin pa bin hashwa ban shim ïa kino kino ki sienjam kiba ktah ïa ka kam kamai jakpoh jong ki trai ri trai muluk. Ka jingleh donbor jong ka Municipal lehse ka dei tang ka buit poh ban pynhun ïano re ïano da kaba ïa sylla ban khñiot beiñ ïa ki longkmie Khasi na ka bynta ka jingmyntoi shimet jongno re jongno,” la kynthoh ka Seng.
“Kum ka seng kaba ieng ban ïada ïa ka hok jong ki trai ri trai muluk kam lah satia ban shu shong kli kti lane ban shu peitkai halor kine ki jingjia hynrei kan sa bishar bniah ban tih jylliew ïa kine kiei kiei baroh ban lap ïa ki jingshisha bad na ka liang jong ka seng kan sa shim ïa ki sienjam ki ban pyntikna ban pynïoh pat ïa ka hok jong ki trai ri trai muluk,” la ong u kyrwoh.
Ka seng ka maham jur ïa kino kino ki tnad jong ki bor sorkar kiba pyrshang ban thombor ïa ki trai ri trai muluk ha ki dur bula kiba pher bapher na ka bynta ka jingïohnong jong ki briew kiba nabar.
