Shillong, Naiwieng, 29: U Sub-Contractor jong ka Dhar Construction Company hapoh ka MeECL (RDSS scheme) Bah Bah Kyntu Shaphrang Sayoo ula ujor sha ki Pulit ban pyntip ba ha ka miet 24 tarik, Naiwieng ki runar ki bym lah ban tip ki la rong ruh ki Cable kiba shongdor kumba T. 5,42,800 lak na ki ar tylli ki jaka trei, kawei kaba don ha Kyan Mymynsar Thlongmoo bad kawei ha ka shnong Ïooksi Ïapkhla, West Jaiñtia Hills.
Ha ka miet 25 tarik, Naiwieng, kawei ka kali Maruti Wagon-R kaba don ïa u nombar ML-12-1076 ba la ñiah da u Ismail Sangma ryngkat bad ki arngut kiba la tip kyrteng kum u Jeleush A Sangma, 25 snem bad u Kron M. Marak, 43 snem, ka la phet bak tang shu ïohi ïa ki Pulit kiba dang ïaid pahara ha ka thaiñ Wa’trebok area, National Highway-127B, East Garo Hills.
Katkum ka khubor ba la pynmih ha Website ki Pulit la pyntip ba ki Pulit kiba la kthong ki la ïoh khang kdong ïa ka kali bad ha ka jingtali ki la ïoh kurup ïa ka masi ba la pyntip ba ka la shah tuh na Samanda area East Garo Hills ha kine ki lai ngut.
U nongñiah jong ka kali u la lait phet na ka kti jong ki Pulit bad arngut ki la shah kem ha ki Pulit.
Uwei u rangbah uba sah ha kawei ka dong ha nongbah Shillong u la ujor sha ki Pulit ban pyntip ba ha u bnai Ïaiong, 2025, kawei ka briew ba la tip kyrteng kum ka Roshni Chettri ka la pynbor ïa u ban thied ïa kawei ka motorcycle ha ka kyrteng jong u da kaba shu siew EMI da ka jingkular ban siew ïa ka EMI manla u bnai.
Hynrei hadien kata, u rangbah u la sngewthuh ba u la shah thok ha ka Roshni Chettri ka bym shym la siew ïa ka EMI jin ar bnai kynthih.
U Bah Shemphang Warjri ula ujor sha ki Pulit ba ha ka miet 25 tarik mynta u bnai ki runar ki bym lah ban tip ki la tuh ïa ka Scooter jong u kaba don ïa u nombar ML-05AB-4430) na Demthring Block-III, Shillong.
U S. Apin Singh u la ujor sha ki Pulit ban pyntip ba ki runar ki bym lah ban tip ki la prong tuh hapoh ka iingsah jong u ha Madanrting Block-F, Shillong bad rong tuh kawei ka Laptop.
Ka Saini R Sangma ka la ujor sha ki Pulit ban pyntip ba ha ka 25 tarik, Naiwieng, ki runar ki bym lah ban ithuh durkhmat ki la rong tuh ïa ka kali Bolero pick-up jong ka, kaba don ïa u numbar ML-13A-6439 na phyllaw ka iingash jong ka, ha Nongchram, East Garo Hills District.
Ki Pulit ki la ujor ban pyntip ba ha ka 16 tarik, Risaw 2025, ha ka jingpynshisha la lap ïa kawei ka syrnot thok (character certificate) ha ka kyrteng jong uwei u briew uba la tip kyrteng kum u Lokesh Gurjar bad u Muneem Singh, kiba la pynrung kyrteng ha ka ophis jong u Inspector General STC BSF, Churanchandpur, Manipur ïa kaba la lap da ka ophis Deputy Commissioner jong ka East Khasi Hills.
