Shillong, Nohprah, 02: Ka Meghalaya State Commission for Women ha ka 2 tarik Nohprah, 2025 ka la pynlong ïa ka jingïathir nia halor ka aiñ Prevention of Sexual Harassment at Work Place (Prevention, Prohibition and Redressal) Act 2013 ha ka jingïalang kaba la long ha State Convention Centre, Shillong.
Ka Chairperson jong ka Commission ka Kong Ïamonlang Syiem haba kren ha kane kane ka jingïathir nia ka la ong, ba ki kynthei wat ha iiing lajong ruh kim shngaiñ. Ka la pynkynmaw ïa ka kyntien kaba ong ha ka ktien nongwei, “from the womb, to the tomb,” lane “na pla khun sha jyntep.”
Ka la ong ruh ba ki kynthei hi kim shngaiñ wat ha ki saw kynroh jong ka iing khamtam leilei haba ki mad ïa ka jingshah leh bein ha la u jong u tnga.
Ka la ong ruh ba ki case POCSO ïa ki khynnah rit ka jur bha ha kine ki sngi.
“Ka jingbym shngaiñ jong ki kynthei ka pynlong ïa ngi ban ïadonlang hangne ban ïathir ïatai,” ka la bynrap.
Ka Chairperson ka la ong ruh ha kane ka jingïathir nia dei ban ïa shim bynta lang ruh da ki shynrang khnang ba kin ïoh jingpynshai shuh shuh shaphang ki kyndon jong ka aiñ kaba ïada ïa ka jingshah jrong kti ki kynthei ha ki jaka trei.
“Haba shu ïaid na iing sha jaka trei ruh ki kynthei kim shngaiñ shuh, ki mad ka jingshah leh be-ijot, shah pynïap bad wat ki khynnah ruh kim shngaiñ,” la bynrap ka Kong Syiem.
“Ka shong ha ngi ban hikai ïa ki khun ki kti ba kin don ka jingtieng burom ïa la ki hymmen. Nga don ka jingkyrmen ba kito ki ban sa long ki kmie ki kpa kin ïohi ïa kane ka bynta namarba ki kam runar ruser ki mih na ka jingpyndonkam palat pud ïa ka mobile phone,” la bynrap shuh shuh ka Kong Syiem.
“Ka ladei ruh ïa ngi ban pyrkhing ïa ka jingpyndonkam ïa ka mobile phone bad ïa ka Internet lada ngi kwah ban ïada ïa la ki khun ki kti,” ka la pynpaw.
