Shillong, Nohprah, 04: U Bah Pillbert Hangse, watla u dei uba don ka jingduna ha ki dkhotmet hynrei ki paidbah ki la shaniah ban pynkupbor kum u Rangbah Shnong jong ka shnong Khamar, ka shnong kaba don ha Ribhoi District kaba dang hap hapoh ka Hima Mylliem.
U Bah Pillbert Hangse u dei uba la pyndep ïa ka jingpule haduh Class-XII bad uba la pule ruh ha St. Anthony’s College na bynta ban pyndep ïa ka Bachelor of Arts hynrei um shym la lah ban pyndep ïa ka jingpule namarba u don ka jingshitom ha ka met.
Kum u rangbah uba don ka mon bajwat, u Bah Hangse, u ñiah ruh wat ïa ka kali Auto Rickshaw, u ñiah ïa ka Scooty bad u buh ruh ïa ka dukan die marbam ban pyndap pynbiang ïa ki jingdonkam ha ka iing ka sem.
Ha ka jingïakren bad u nonglum khubor ka Batesi Tv u Bah Hangse u la ïathuh ba ynda u la dap dap 8 snem ka rta u la don ïa ka jingduna ha ki dkhotmet hadien ba u la hap najrong u dieng ha kaba ym shym la lah shuh ban sumar wat haba ki kmie ki kpa jong u ki la ïalam ban leit sumar kylleng kylleng.
U Bah Hangse u la ïathuh ba u la shah jied kum u Rangbah Shnong jong ka shnong Khamar mynta dang kumba 6 bnai eiei hadien ba ka ladei ka por ban pynthymmai ïa ki nongïalam shnong, ma u ruh u la thep kyrteng kum u kyrtong ban ïakhun ïa ka kam Rangbah Shnong bad ki paidbah ruh ki la ibit ban pynkhamti ïa u kum u Rangbah Shnong ba thymmai jong ka shnong Khamar.
Ka shnong Khamar kaba don kumba 34 tylli ki tnum iing ka la buh kyndon ba tang ki nongshong shnong kiba don ïa ka Election Photo Identity Card ki don hok ban jied ïa u Rangbah Shnong.
Kum u Rangbah Shnong bad u briew uba don jingduna ha ki dkhotmet, u la kyrpad ïa ki ophisar Sorkar, ïa ki nongmihkhmat bad ïa ki kynhun sengbhalang ban ai ka jingïatreilang khnang ban wanrah ïa ki kam pynroi hapoh ka shnong ka thaw.
