Shillong, Nohprah, 06: Kawei ka Bos Saw jong ka Sorkar kaba don ïa u registration no ML01-7368 kaba la phiel brake kynsan ka la leit tynrah beit beit ïa ka jingker jong ka lynti ïaid kjat ha Police Bazar, Shillong hajan ka Shiv Mandir. Donbok ba ha kane ka jingjia kam shym la don kano kano ka jingjia ba sngewsih ne ka jingmynsaw jong ki nongïaid lynti bad ki nongleit nongwan.
Kane la jia ha ka sngi Saitjaiñ ha ka por kumba 11:30 baje mynstep.
U nonglum khubor jong ka Batesi TV u ba la poi ha kane ka jaka u la lap ba hapoh kane ka Bos ym shym la don shuh ki briew kiba shong hapoh hynrei u don tang u nongniah jong ka Bos bad u nongbud ïa kiba ym pat lah ban ïoh kyrteng kat haduh ba la thoh ïa kane ka khubor.
Ïa u nongñiah bad ïa u nongbud jong ka Bos la pynkit noh sha Shillong Civil Hospital na ka bynta ban leh ïa ka medical chec- up.
Kane ka jingjia ka la pynher syrngiew lut ïa ki nongleit nongwan ha kane ka jaka namarba ka dang dei ruh ka por kaba ki briew ki dang ïa beh ban leit thied leit pet sha Iewduh bad sha iew Khyndai Lad.
Ka jingker nar jong ka lynti ïaid kjat ka la pra phum bad ka bynta ba shakhmat jong ka Bos ruh ka la julor.
