Shillong, Nohprah, 08: Ki nongïalam jong ka Khun Hynñiewtrep National Awakening Movement (KHNAM) ki la leit ban ïakynduh ïa u Secretary ka Secretariat Administration Department (Accounts) ka Sorkar Jylla hadien ba u la phah da ka jingthoh ka seng ha kaba ïadei bad ka jingpan RTI ïa ka jingdon jong ki nongtrei bylla sngi hapoh ka ophis Secretariat, Shillong.
“Ngi shim ïa kane ka jingkhot kum ka jingkwah jingshai jong u Secretary khnang ba kan ym don kano kano ka jingsngewthuh bakla. Hynrei kumba ngi lah pynpaw ha u Secretary ba ka jingïoh ïa ka shithi ba kam dei katkum ka kyndon jong ka RTI Act, 2005 hynrei ngi shim beit ba ka dei ka jingpyrshang ban ïoh ïa ki jingtip kiba bniah halor ka jingkwah jong ngi khnang ba ka jubab nangne shakhmat kan ym bakla shuh,” la ong u Working President ka KHNAM u Bah Thomas Passah ha ka jingïakren bad ki lad pathai khubor hadien ka jingïakynduh ïa u Secretary ka SAD ha ka Lah Sngi u Blei.
Haba ïathuh bniah, u Bah Passah u la ong, ‘ngi ladep ban pan da ka RTI na ka SAD bad ngi la pynpaw ruh ïa ka jingbymhun ïa ka jubab RTI ba la ai da u Public Information Officer (PIO). Ngi la pan ïa ki kyrteng kiba don da ki spah ngut kiba ka SAD ka siew tulop manla u bnai hynrei ha ki ar tylli ki khep ka tnat SAD kam shtm la lah ban ai ïa ka kyrteng jong ki nongtrei,” u la ong.
“Ha ka jubab RTI kaba ar ka SAD (Accounts) ka la ai ïa ngi da ki nombar halor ka jingdon jong nongtrei bylla sngi. Ha ka RTI ngi ong ruh ai ha ngi ïa ki thup kyrteng, ngi khlem ong ai ha ngi katno ki don,” la ïathuh u Bah Passah.’
“Namarba ngim hun ïa ka jubab ngi la ujor sha ka Appellate Authority bad mynta ka sngi hadien ba la ïoh ïa ka shithi ba kan don ka hearing ngi la leit ban ïa kynduh ïa u Secretary ka SAD,” ula ong bad bynrap, “ngi la kren da kaba shai ba kane kaba ngi leh ka long ban pynkhuid pynsuba ïa kiba bun bha ki kam bamsap ki bym ïahap ha ki tnat.”
“U Secretary u la ong ruh ïoh ba ki kyrteng kiba phi pan pan kin dei ki Personal Information namarba katkum ka Section 8 jong ka RTI Act, 2005 ngim lah ban ïoh ïa ki jingtip shimet, hynrei kane kaba ngi pan ïa ki thup kyrteng kam dei ka jingtip shimet hynrei ka Official Information,” la bynrap u Working President ka KHNAM.
Haba kylli u Bah Passah u la ong, “ngi ki paidbah ngi donhok ban tip ïa ka pisa u paidbah la siew tulop shano? Kan long kaba bakla ban ong ba la siew tulop ha uwei u bnai 20 lak sha ki 200 ngut, hynrei mano kita ki 200 ngut? Ngi donkam ban ïoh jingshai namarba ngi sheptieng ïoh ba ka pisa ka poi sha ka pla jongno re jongno. Ngi la pynshai ïa kata ka nongrim jong ngi bad u Secretary u la kylli ruh kaei ka daw ba phi pan RTI. Na ka liang jong ngi, ha i kyntien iba shai ngi la ong ba ka jingkwah ban pan RTI ka long ban pynthikna ba ka bamsap bampong bad ki jingthungkam beaiñ kam lah ban don ha ki tnat bapher bapher bad ngi hap ban pynkhuid ïa kane.”
“Ki don bun ki khun ki khun samla kiba kwah kam kwah jam hynrei ka dei ban long da ka lynti kaba shai khnang ba kan ym don ka jingleh shiliang lane ka jingthungkam tang ïa ki briew jong ki Myntri Sorkar,” u la ong shuh shuh.
“Ngi la pynshai ha u Secretary ïa ki nongrim ba ynda ngi la ïoh ïa ka thup kyrteng (jong ki nongtrei) ki don ki bynta kiba ngin sa leh ïa ka Homewrok bad ngin sa pynshai sha ki paidbah ïa kaei kaba ngi lap na ka jubab kaba ngi ïoh na ka SAD,” la ong u Bah Passah.
