Shillong, Nohprah, 13: Ki paidbah na kylleng ki jylla ki la tuid sha nongbah Kolkata, West Bengal ban leit sakhi ïa u khlur ïalehkai phutbol ba pawnam ka pyrthei u Lionel Messi.
Naduh ka por mynstep ki paidbah ki la ap ha Salt Lake Stadium lano ban ïohi ïa ka dur jong u Messi hynrei kaba pynsngewsih ïa ki ka long ba u Messi u la mih ha madan tang 10 minit bad hadien kata u la mih noh.
Kane ka la pynbitar ïa ki paidbah bad ki la thaw jingkulmar da kaba kawang da ki bilor ïa ki nongpynïaid bad ki la kawang ruh da ki bilor um ha ki jaka ba don ki riewheh riewhaiñ kiba la shah khot sngewbha.
Ki bor pahara ki la mareh wut wut ban ym ailad ïa ki paidbah ban tur shakhmat bad ban pyntikna ba kan ym don jingpynwit ïa ka lynti ïaid jong u Messi.
Bun ki paidbah ki la phong ïa ka Jersey jong ka ri Argentina ban ai burom ïa u Messi bad ki la ap ïa u Messi naduh ka por 8 baje mynstep bad u la rung ha madan phutbol ha ka por 11:00 baje tam.
Halor kane ka jingjia, ki Pulit ki la kem ïa u nongpynïaid ïa ka jingwan jong u Lionel Messi sha India.
U Additional Director General Law and Order jong ka West Bengal u Jawed Shamin u la ïathuh ba ka la don ka ejahar pyrshah ïa u Satadru Dutta uba dei u nongpynïaid bad ki Pulit ki la kem ïa u.
Ka jingthaw jingkulmar ki paidbah ka dei namarba ki la siew ïa ka bai tiket ha ka dor kaba rem kaba naduh T.5000 hajar haduh T.25 hajar hynrei ki ïoh peit ïa u Messi tang 10 minit bad kata ruh kim ïohi bha ïa u bad ki la kynnoh ba ka daw ka dei namarba la kah ïa u Messi da ki politishian bad ki heh ki haiñ kiba hiar lang sha madan.
Ka Myntri Rangbah jong ka West Bengal ka Mamata Banerjee ka la panmab na ki paidbah bad na u Messi halor ka jingmih kane ka jinghuri hura.
Ka la pynbna ruh ba ka la thaw da ka komiti ka ban khlieh da u nongbishar ba la shongthait u Justice Ashim Kumar Ray ryngkat ka jingdonlang ki dkhot ba kynthup ïa u Chief Secretary bad u Additional Chief Secretary ban tohkit bniah ïa kane ka jingjia.
Ha kane ka jingkulmar ki Pulit ka jylla bad ki Pulit ka Rapid Action Force ki hap ban pyndonkam da ka bor ban pynpra ïa ki paidbah namarba ki la thmu ban pynpra syndon ïa ka Stadium.
U nongpynïaid u Satadru Dutta u la kular ban pynphai noh ïa ka bai tiket kaba ki paidbah ki la thied na ka bynta ban peit ïa u Messi.
