Shillong, Nohprah, 16: Ki dkhot bad ki nongïalam jong ka Hynniewtrep Achik National Movement ha ka step sngi Baar kiba la leit leit khynra ha ki dukan bar jylla ha Iewduh ki la lap ba ki don ki dukan bar jylla ba la kynnoh ba ki la leh thok ha ka jingthew bad ki maw kilo ki dei ki bym biang jingthew kaba la wanrah ka jingduhnong bakhraw ïa ki paidbah nongthied nongpet.
Hadien kane, ka seng ka la khang noh ïa kine ki dukan bad maham ruh ba ka seng kan nang pynjur shuh shuh ïa ka jingkhynra nangne shakhmat.
Katba ki dkhot ka seng ki dang pynlong ka jingkhynra, la wan poi ki Pulit kiba la pynsangeh noh da kaba ong ba kane ka jingkhynra ka long kaba be-aiñ bad kaba lah ban pynmih ïa ka huri hura ka ban ktah ïa ka shongsuk shongsaiñ.
Ki bor Pulit ki la bthah ruh ïa ki nongïalam ka HANM lada ki kwah ban khynra ïa ka jinglehtuh ha u mawthew kilo da ki nongdie ki dei ban wan lang bad ki nongtrei na ka tnat Metrology lane bad ki nongtrei ka Khasi Hills Autonomous District Council (KHADC).
U nongïalam ka HANM East Khasi Hills Bah Barthol Sohlang ha ka jingïakren bad ki lad pathai khubor u la ong ba ka jingkhynra jong ka seng ka long namar ka jingïoh ujor na ki paidbah nongthied nongpet.
U la ong ba ka seng ka la lap ha ka jingkhynra ba u maw kilo uba ki nongdie ki dok kam ïahap satia bad ka jingthew bad ong ruh ba ka paw ka jingleh thok jong ki nongdie.
“Ngi maham tyngeh ïa ki nongdie ba nangne shakhmat ngin dang wan. Kim bit ban die palat pud katkum ka hok jong ki paidbah bad ba ïa u mawthew kilo dei ban leit rah ha ophis ka Metrology khnang ban pynthikna ba kan ym don ka jingthew tuh ïa ki mar,” u la ong.
U Bah Bawan Nongsiej u la kyntu ruh ïa ki paidbah nongthied nongpet ba ki dei ban long kiba husiar ïa ka jingshim kabu jong ki nongdie khamtam ha kum kane ka por ba la poi ka aiom Christmas.
