Shillong, Nohprah, 19: U Myntri Rangbah ka Jylla u Conrad K. Sangma u la kyntait ban ïathuh bniah halor ka jingkam jong ka seng kieng atiar Hynñiewtrep National Liberation Council (HNLC) ba la shah khein beaiñ ba ka la pynbthei ïa u bom IED ha ka shlem treikam jong ka Dhar Company ha ka shnong Shymplong, East Jaiñtia Hills District.
Halor kane ka jingjia, ki Pulit ka East Jaiñtia Hills ki la kem ia ki arngut ki nongiarap barieh ne ki overground workers jong ka HNLC.
Ha ka jingïakren bad ki lad pathai khubor ha ka sngi Thohdieng, u Sangma u la ong, ka jingkynnoh jong ka HNLC ïa u Symbud Myntri Rangbah ka Jylla u Bah Sniawbhalang Dhar ka long markhongpong namarba kane ka seng kieng atiar ka kam ba u Bah Dhar u ju siew ïa ka pisa ba la dawa da ka seng katba mynta pat ka kam ba um shym la siew satia ïa ka pisa ba la dawa.
Ha kaba ïadei bad kane, u Conrad Sangma u la ong ba ki Pulit kin sa leh la ka jong ka kamram ban kem ïa kiba donkti ha kane ka kam bymman.
“Ngam da kwah than ban batai bniah hynrei ki Pulit kin sa leh la kamram bad ki la ïoh ki jingtip kiba biang ban leh eiei halor kane jingjia katkum ki sakhi satar ba ki la ïoh lum.” ula ong.
