Shillong, Nohprah, 22: Ki Pulit ka Ribhoi bhoi District ki bym shym la shongthait ha ka Lah Sngi u Blei hapoh ka jingïalam u Senior Superintendent of Police (SSP) u VS Rathore ki la hiar ban talasi naphang ïa ki kali kiba ïaid lyngba ka surokbah National Highway-6.
Ha kane ka jingtalasi ïa ki kali ha surokbah ha ka shnong Quinine la synran lang da u Addl. SP ka Ribhoi u Bah O. Massar bad ki heh Pulit ophisar ka Nongpoh bad Umsning Police Station.
Ki Pulit ki la tar lut ïa ki kali ba tah iit ïong bad ha kane ka jingtalasi ki Pulit ki la lap ruh ar tylli ki kali kit pisa jong ki Bank kiba pyndait ïa ki Siren khlem da don ka jingthoh kaba biang bad khlem ka jingïoh jingbit ba ki lah ban pyndonkam ïa ki Siren.
Ki Pulit ki la lap ruh ba don ki kali kiba pyndonkam ïa ki jingthoh Govt. Of Meghalaya ha trai jong ki number plate khlem da don ki ophisar jong ka Sorkar Jylla hapoh kali bad mardor ki Pulit ki la pyndam shi syndon ïa ka jingthoh bad mana ruh ïa ki nongniah kali ba kim bit satia ban pyndonkam bakla ïa ki jingthoh.
