Shillong, Nohprah, 29: Da kaba buh hakhmat ïa ka thong ban pynlong ïa ka shnong Mawdun kaba khuid kaba itynnat bad ka ban wanrah burom ïa ka District bad ïa ka jylla baroh kawei ka Green Tech Foundation, kaba long kawei na ki kynhun kaba ju trei radbah ban ïada ïa ka mariang, ha ka sngi Saitjaiñ jong ka taiew baladep ka la shimti bad plie ïa ka ‘Mawdun Model Village for Environmental Stewardship’ ha ka shnong Mawdun. Ban poi sha kane ka shnong, yn hap ban ïaid na ka surok kaba pynïasoh na lad lum Mawnei kaba dang hap hapoh ka shnong Mawlai Nongkwar.
Kane ka dei ka jingkut jingmut jong ka Dorbar Shnong Mawdun kaba hap ha ka Dorbar Area Diengiei bad ka Green Tech Foundation ban pynlong ïa ka shnong Mawdun kum kawei na ki shnong kiba khuid tam ha ka Sohiong Constituency nalor ba ka dei ruh ka shnong kaba don harud ka pung Umïam.
Ha ka jingplie paidbah ïa ka ‘Mawdun Model Village for Environmental Stewardship’ la sakhi lang da u Director Earthtree u Bah Sunny D. Mawiong ryngkat lang u Chairman jong ka Green-Tech Foundation u Bah H. Bansiewdor Nonglang, ki dkhot jong ka Green-Tech Foundation, ka Dr. Bashida Massar, u Dr. H. H Mohrmen, u Bah Pynshai na ka Smart Village Movement, ka Kong Ria Suting, ki nongmihkhmat na ka Dorbar Area Diengiei, ki nongïalam shnong ka Umthlong, ka Nongpathaw, ki stad mariang bad kiba la shah khot sngewbha.
Ka jingsdang ïa kane ka sienjam na ka bynta ki nongshong shnong jong ka shnong Mawdun ka dei kaba la saiñdur bha ïa kaba yn pyntreikam ïa ki thong na ka bynta ban pynneh pynsah bad ban ïada ïa ka mariang na ka bynta ka jingmyntoi hi jong ki nongshong shnong.
Kawei na ki lad kaba khring bha ïa ka Green-Tech Foundation ban shimti ha lade ïa ka shnong Mawdun ka dei namar ka jingpynpaw jong ki nongshong shnong ïa ka jingieid mariang, ka akor ka burom jong ki nongshnong bad ka jingïatylli hapdeng ki nongshong shnong.
Ka Green-Tech Foundation ka la kut jingmut ruh ba lada kane ka projek kan urlong kumba ka la thmu, kan sa phai khmat ruh sa sha kiwei pat ki shnong kiba don hapoh ka jylli jong ka East Khasi Hills District.
Sa kawei pat ka jingthmu jong ka Green-Tech Foundation ka long ban pynlong ïa ka shnong Mawdun kum ka shnong kaba khuid tam, kaba kup ïa ka jingjyrngam bad ka shnong kaba lah ban ïada kyrpang bad ban sumar sukher ïa ki dieng ki siej bad ki jingthaw kiba im ha pneh ka mei mariang da kaba buh hakhhmat ïa ka thong kaba don jingkitkhlieh kum ka shnong ka thaw.
Kum ban shu pyntip hangne ba ka shnong Mawdun ka dei ka shnong kaba nguid lut ïa ki jaboh jabaiñ na kylleng ka sor Shillong ba la pyntuid sha wah Umkhrah bad ha ka wah Umshyrpi kiba noh arsut ha pung Umïam watla ka shnong
Mawdun da lade hi kam dei ka shnong kaba pynmih ïa ki jaboh jabaiñ. Kumta ka Green-Tech Foundation ka shim ïa kane ka sienjam ban shim hi noh ha lade bad ban pynlong pat ïa ka shnong Mawdun kaba khuid bad kaba itynnad tam ym tang ha ka East Khasi Hills District, hynrei ha ka Jylla bad ha ka Ri-India hi baroh kawei.
Ka Dorbar Shnong Mawdun ryngkat lang bad ka Green Tech Foundation lyngba ka ‘Mawdun Model Village for Environmental Stewardship’ ka pdiang sngewbha ïa baroh kiba kwah ban wan bam lyer pyngngad, ban ring dur, ban wan shangkai suwari hapoh u pud u sam jong ka shnong, hynrei ka kyrpad bad kyntu ban bud ryntih ïa ki kyndon kiba ka ‘Mawdun Model Village Management Committee ka la buh hakhmat ka khyrdop shwa ba phin rung shapoh u pud u sam jong ka shnong.
