Shillong, Nohprah, 29: Kumba ju long manla u snem, mynta u snem ruh ka komiti jong ka Shlem jingïarap sha ki baduk tam jong u Rupang, ka la bteng ban sam ïa ki lad jingïarap sha ki longiing longsem kiba wan na ki longiing baduk na kiba duk tam kiba ka komiti ka la ibit ba kin ïoh ïa ka jingïarap.
Kane ka dei ka jingïaid lynti kaba khatsaw jong kane ka komiti ban kner ïa ki jingïarap sha ki baduk bad ha kane ka kynti ki don 10 tylli ki longiing kiba la ïoh ïa ka jingïarap da ki tiar ki tar kiba ki lah ban pyndonkam manla ka sngi.
Ha ka jingïalang kaba lyngkot kaba la long ha phyllaw jong ka Mawkhar Christian Higher Secondary School, Mawkhar, Shillong ha ka Lah Sngi u Blei, ka Superintendent jong ka A.W Thomas Orphanage ka Kong S.Khyriem ka la shim ïa ka bynta ban long kum ka kongsan ha ryngkat ka jingïadonlang jong kiwei pat kiba la shah khot sngewbha ba kynthup ïa u President jong ka Hynniewtrep Achik National Movement (HANM) Bah Lamphrang Kharbani nalor kiwei pat.
Ka Kong Khryiem haba kren kum ka kongsan ka la jaw ummat brup haba ka kynmaw ïa ki khana kiba ka kmie jong ka, ka ju ïathuh ïa ki jingjynjar bad aki jingkordit kiba ka kmie ka im kum ka khunswet ha kaba tang ka ja ban bam ruh ka eh ïa ki ban ïoh.
Ka la ong ba haba ka kynmaw ïa kita kiei kiei baroh ka la pynlung mynsiem bad pynpangnud ïa ka.
U President ka HANM u Bah Lamphrang Kharbani u la pynkynmaw ïa ki jingeh ha ki por ba u dang khynnah namarba u ruh u dei u khunswet uba la im jynjar bha.
U la pynpaw ba ha ki snem ban wan, ka HANM kan sa ai ka jingïatreilang bad ka Shlem Jingïarap ïa ki baduk tam ha kaba yn sa thaw lad ban pynshna noh da ka ïing ïa ki baduk ha ki District bapher ha kylleng ki bynta ka rilum Khasi bad Jaiñtia.
