Guwahati, Nohprah, 30: Ki bor Pulit bad ka tnat syntiat ki la lap ksai ïa ka jingtreikam buhrieh jong ki lehnoh Jehadi ha ka jylla Assama, Tripura bad ha West Bengal, hadien ka jingpeitngor bad ka jingbuddien ïa ki kam pyntriem ha kane ka thaiñ Shatei Lammihngi.
Lyngba ka jingïoh jingtip na ki tnat syntiat ka Sorkar Pdeng ki Pulit ki la lap ksai ïa ki jingtreikam jong ka Imam Mahmuder Kafila ka kynhun lehnoh na ka ri Bangladesh bad kaba don ïa ki tnat kiba treikam ha Assam, Tripura bad West Bengal.
Ki 11 ngut ki dkhot ba snar jong ka Imam Mahmuder Kafila kiba la shah kem ha ki Pulit ki dei kiba la tip kyrteng kum u Nasim Uddin ba ju khot sin kum u Najimuddin bad Tamim uba la 24 snem ka rta na ka shnong Nichuka, Barpeta District, u Junab Ali uba la 38 snem ka rta na ka shnong Majarababari, Chirang District, u Afrahim Hussain uba la 24 snem ka rta na Ward No.8, Islampur, Mangaldoi, Darrang District, u Mizanur Rehman uba la 46 snem ka rta na ka shnong Barpeta Road Ward No.2, Barpeta District, u Sultan Mehmud uba la 40 snem ka rta na ka shnong Nichuka, , Barpeta Road, Barpeta District, u Muhammud Siddique Ali uba la 46 snem ka rta na ka shnong Khoirabari, Barpeta Road, u Rasidul Aalam uba la 28 snem na ka shnong Jakhlibil Pothar, Gobardhona, Baksa District, u Mahibul Khan uba la 25 snem ka rta na ka shnong Merajhar, Gobardhona, Baksa District, u Sharuk Hussain uba la 22 snem ka rta na ka shnong Uttar Aathiabari, Barpeta Road, Barpeta District, u Muhammud Dilbar Razak uba la 26 snem ka rta na ka shnong Gandharipar, Barpeta Road, Barpeta District bad u Jagir Miah uba la 33 snem ka rta na ka shnong South Joy Nagar, AD Nagar, West Tripura district, Agartala.
Ka Imam Mahmuder Kafila ka dei ka shnat treikam jong ka seng kieng atiar Jamaat-ul-Mujahideen Bangladesh ) kaba la shah khein beaiñ bad la seng ïa ka ha u snem 2018 da u Jewel Mahmud, ïa uba la tip kyrteng kum u Imam Mahmud Habibullah lane u Sohail, uba dei u dkhot barim jong ka JMB uba sin kyrteng ïalade kum u Amir jong ka seng IMK.
Ki tnad syntiat ki la ïoh jingtip, hadien ka jingkylla ka saiñhima sima ha ka ri Bangladesh ha u bnai Naailar, 2024, ki nongïalam ba rangbah jong ka JMB, ka Ansarullah Bangla Team bad ka Al-Qaeda at Indian Subcontinent ki la bthah ïa ki nongïalam ka IMK ban pyntreikam bad pynïar ïa ki jingtreikam jong ka ha India. Hadien kane, la bynshet ïa ki ar ngut ki nong Bangladesh, u Umar bad u Khalid, ba kin pyntyllun ïa ki kam jong ka seng ha Assam, ha kaba ïa ka Local Cell, la khlieh hi da u Nasim Uddin uba la ju tip kyrteng kum u Tamim na Barpeta Road.
Ïa kine ki kam ba la kdew la pyntyllun lyngba ki lad pathai khubor ba shngaiñ. Kawei na kine ki kynhun ka dei kaba la tip kyrteng kum ka ‘Purva Akash’, kaba treikam kum ka Principal Communication and Recruitment Platform.
