Shillong, K’lyngkot, 08: Ki runar ki bym lah ban tip, ki la khlong tuh haduh 27 tylli ki Pipe um kiba dei na ka skhim Jal Jeevan Mission ba la pynpoi ïa ka umbam umdih sha ka shnong Jorbil bad ha ka shnong Umlangpur.
Kane ka jingkhlong tuh ki runar ïa ki pipe um ka la wanrah ïa ka jingkyrduh um ha kine ki ar tylli ki shnong bad nalor kata, ka skhim JJM ba la pynpoi um sha ki ar tylli ki shnong ka la kot haduh 3 klur tyngka.
Ka jingïoh jingtip halor ka jingshah khlong tuh ki pipe um ka la paw pyrthei hadien ka jingujor jong ki nongshong shnong sha ki bor pynïaid shnong namar ka jingbym poi shuh ka um hapoh ka shnong jong ki.
Ki bor synshar shnong kiba la leit jurip ïa ka jaka sam um ki la lap pynban ba ki runar ki la dep khlong ïa ki pipe um bad rong tuh haduh 27 tylli ki pipe.
Halor kane ka jingjia ki bor synshar shnong ki la pyntip sha ki Pulit bad ki la leit ban jurip lang ha ki jaka ba shah tuh ki pipe um bad ka dorbar shnong ka la ujor ruh da ka ejahar ha Khanapara Police Station da kaba kyntu ïa ki Pulit ban thwet bad ban kem ïa ki runar kiba donkti ha kane ka kam bymman.
