Shillong, K’lyngkot, 08: Ka tnat pynïaid kali jong ki Pulit ka Shillong Traffic Police ki la ïoh lum 2 lak, 64 hajar na kaba daiñ kuna ïa ki nongnaih kali kiba pynkhein ïa ka aiñ niah kali hadien ba ka tnat Pulit ka la pynmih ïa ka jingpynbna ba la ba la khang ïa ki kali jong ki riewpaidbah ban tah ïit ïong, ban pyndait siren bad kiwei kiwei ki jingmana.
U Superintendent of Police ka East Khasi Hills Disctrict Bah Vivek Syiem ha ka jingïakren bad ki lad pathai khubor ha ka sngi Palei u la ïathuh ba naduh ba la pynmih ïa ka jingpynbna ka tnat Pulit ka la peitngor bad talasi naphang ïa ki kali kiba tah ïit ïong ha nongbah Shillong bad ha khap sor.
Katkum ka jingïathuh jong u ha kane ka jingpeit pyrman jong ki Pulit ha ka Disctrict ha kine ki khyndiat bnai ka tnat Pulit ka la ïoh ban bat kumba 300 tam tylli ki kali.
U Bah Syiem u la kyntu ïa ki paidbah ba kim dei ban tah ïa ki iitïong kumba ladep ban mana da ki bor jong ka aiñ bad kyntu ruh ïa ki paidbah ba kin weng noh ïa ki light ba thaba bad ban ym pyndonkam ïa ki namarba ka ktah bad pynthud ïa kiwei pat nongniah kali kaba lah ban lam sha ka jingaksiden.
Ha kaba ïadei pat bad ki thuk thuk arshaka kiba ju pynher sted, ki bym phong helmet, kiba ïaid na ka lynti bym dei kaba buh jingma ïa kiba niah kali khamtam ïa ki nongïaid kjat, u SP u la ïathuh ba ka tnad Pulit ka la peit pyrman bha lyngba ki CCTV ha kylleng sawdong bad lada lap ïa kiba pynkheiñ aiñ ka tnat kan sa leh da kaba tyngeh ryngkat ka jingdaiñ kuna.
U SP u la pynpaw ka jingsngewkmen kaba khraw ba ha ka Christmas bad New Year ka tnad Pulit ka la lah ban trei bha ha kaba kam shym la don kano kano ka jingija ba sngewsih ha surok.
U la ïathuh ba ka tnat Pulit ka la pynkup burom ruh ïa ki Pulit kiba don ha ka kamram ha ka Chrismas bad New Year.
