Shillong, K’lyngkot, 12: Ki kynhun bapher bapher ka skulbah NEHU ba kynthup ïa ka NEHUSU, ka NEHUNSA ka NEHUTA bad ka ka KSU Unit ki la ïakynduh ïa u Myntri ka tnad Pule Puthi u Bah Lahkmen Rymbui da kaba kyntu ïa u ban pynthikna ba ka Pro-VC jong ka NEHU Tura campus ka Prof. Fameline K. Marak kan ai kaiphod sha ka ophis treikam jong ka Shillong Campus.
Kane ka jingkyrpad ka la mih na ka jingbym don jong u Vice-Chancellor u Prof. Prabha Shukla jin haduh 422 sngi. Ka kynhun ka la maham ba lada ka Pro-VC kam lah ban shimti ïaa ka shuki kum ka Acting Vice Chancellor ka dei ban hiar shuki noh da kaba ailad ïa u Senior Most Professor ban shimti ïa ka kam kum u Acting VC.
Haba kren ha ki lad pathai khubor hadien ba la wai ka jingïalang ha ka sngi Nyngkong, u President ka North Eastern Hill University Teacher’s Association (NEHUTA) u Prof Lakhon Kma u la ong, “ngi la ïakynduh ïa u Myntri ka tnad Pule Puthi u Bah Lahkmen Rymbui ban pynpaw ïa ka jingsngewsih jong ngi kum ka skulbah. Ym don shuh u Vice Chancellor, ym don Pro-VC, ym don Registrar, ym don Finance Officer, ym don shuh mano mano bad ïa ka skulbah la shu pynïaid ha ka Autopilot Mode namarba mano mano ruh ym lah satia ban shim rai.”
U Kma u la banjur ba ki kyndon aiñ ki batai shai ïa ka rukom shimti kam ha kaba u Pro-VC u shimti ïa ki kamram jong u Vice Chancellor ha ka jingbymdon jong ki. Hynrei ka Pro-VC ba mynta ka Prof F.K Marak kam shym la pyntip sha ka ophis treikam sha nongbah Shillong watla la kyrpad ïa ka ban leh kumta.
“Ka jingkitkhlieh ka shong ha ka ban wan pyndep ïa ka kamram jong u Vice Chancellor ha Headquarter. Lada kam kwah, ka hap ban risaiñ noh na ka kam Pro-VC jong ka Tura Campus,” la ong u Prof. Kma bad bynrap ba kum ka kynhun ki la phah da ka jingthoh sha ka naduh 15-20 sngi mynshwa, hynrei kam shym la jubab satia.
“La kyntu ïa u Myntri Pule Puthi ban tuklar bad ban pynbor ïa ka Pro-VC ba kan shimti ïa ka kam jong ka ne ban risaiñ noh, da kaba ailad ïa u Professor uba la kham rangbah ban shimti ïa ka kam kum ka Acting VC”, u la ong.
“Haba ka dei ka Pro-VC, kam lah ban ong ba ngan dang long kum ka Pro-VC ha Tura hynrei ngan ym pyndep ïa ka kamram ha ka Headquarter namar ka kyndon aiñ ka ong ba phi hap ban pyndep ïa ka kamram kum u VC haba u VC um don ha ka jaka treikam bad baroh ngi tip ba u VC u don shabar jaka treikam ha kine ki 422 sngi ba ladep bad u dang ïoh ïa ka tulop kaba pura bad ngim tip hi ruh haei u sah,” la bynrap shuh shuh u Prof. Kma.
