Shillong, K’lyngkot, 14: Ka Hynñiewtrep Youths’ Council (HYC) ka la pynrem jur ïa ka jingshim rai ka Meghalaya Transport Corporation (MTC) ban pynkut noh ïa ki jingpynïaid ïa ki bos na bynta ki khynnah skul naduh ka 1 tarik Ïaiong, 2026, ka rai kaba yn ktah jur ïa ki hajar ngut ki khynnah skul bad ïa ki longïing jong ki ha kylleng ka jylla.
“Kane ka rai kaba la shim kynsan ka pyni ïa ka jingbym burom bad jingbym khein snep ïa ka jingshngaiñ jong ki khynnah skul, ïa ka jingïoh lad ban pule putti bad ïa ka jingmyntoi uba bun Balang. Na bynta bun ki longïing, khamtam kito kiba wan na ki Ing kiba duna ka ïoh ka kot, ki bus MTC kim dei tang ka jingsiew ha ka leit ka wan hynrei ki long ka jingïarap ba donkam eh kaba pynthikna ïa ka jingïaid lynti kaba shngaiñ bad kaba lah ban siew,” ong ka seng ha u kyrwoh ba la phah sha ki lad pathai khubor.
Haba buh jingkylli ïa ka MTC, ka seng ka la ong, “kumno ka MTC kaba dei ka jong ka Sorkar ka shim ïa kum kane ka rai khlem da pyrkhat ïa ka bit ka biang jong u paidbah bad khlem da pynbeit da dumwei pat na ka bynta ka suk ka bha jong ki khynnah bad ki ing ki sem jong ki.”
“Ban pynbor ïa ki khynnah skul ban shaniah ha ki kali paidbah kiba khapngiah, ki kali bym shngaiñ lane ban ïaid ïa ki lynti kiba jngai ka buh ïa ki ha ka jingma kaba khraw bad ka ktah ruh ha ka liang ka pisa pilaiñ,”la kynthoh ka seng.
Ka HYC ka pynpaw ba ka pule puthi kam lah ban shah pynwit namar ka jingbym biang ka rukom pynïaid kam jong ka MTC ne jingduna ha ka pla tyngka jong ka. “Lada don ki jingeh, ka dei ka kamran jong ka Sorkar bad ka MTC ban pynbeit ïa kita kiba jingeh ym ban pynkit ïa ka jingkit ha ki khynnah skul bad ki kmie ki kpa,” la ong ka seng.
Namarkata, ka HYC ka dawa ba ka MTC ka dei ban bishar thymmai bad ban weng noh mardor ïa ka rai ban pynkut ïa ki bus skul naduh ka 1 tarik Ïaiong, 2026, ban bteng ïa ki bus MTC na bynta ki khynnah skul haduh ba ynda pynkhreh ïa ka lad jingïarap kaba shngaiñ, kaba lah ban siew bad kaba pdiang paidbah bad ban don ka jingïasyllok bad pynsngew paidbah kaba shai bad baroh kiba don bynta lang, kynthup ïa ki kmie ki kpa, ki skul bad ki kynhun
Ka HYC ka pynpaw shai ba kan ym shu sngap jar ïa kum kine ki rai kiba ktah ïa ka lawei bad ïa ka jingshngaiñ jong ki khynnah skul.
“Lada ki bor ba dei peit kim pyrkhat thymmai ïa kane ka rai, ka Council kan leh ïa kaba donkam na ka bynta ban ïada ïa ki hok jong ki khynnah skul bad ka jingpyntip jong ki paidbah,” la maham ka seng.
