Shillong, K’lyngkot, 15: Ka kudam buh tiar jong ka Sports Department ka Shillong Engineering College ha Shillong Polytechnic, Mawlai Kynton Massar, Shillong ka la kem ding kynsan ha ka sngi Palei ha ka por kumba 7:00 baje mynstep bad pynjulor lut ïa ki tiar kiba don hapoh kane ka kamra.
Ka kamra kaba pluh ka dei kaba don ha ka mala kaba shalor. Ki ophisar ki la ïathuh ba kane ka kamra ka dei kaba la buh ïa ki nep syiad bad kiwei kiwei ki tiar ïalehkai sports bad na ka bynta ki tamasa jong ki samla.
Ka jingtohkit ba malu mala ka pynpaw ba ka jingkem ding ka lah ban dei na ka jingthud ka bording elektrik.
Da ka jingpoi kloi jong ki kali pynlip ding ka tnat Fire and Emergency Services la lah ban pynlip noh ïa ka ding kaba la klang hapoh ka kamra.
U Myntri ka tnat Pule Puthi ka Sorkar Jylla u Bah Lahkmen Rymbui, ki ophisar na ka tnat Sports and Youth Affairs bad u Principal ka College u Dr. Comingstarful Myrthong ki la leit jngoh ïa kane ka kamra hadien kane ka jingjia.
Ki bor pynïaid jong ka College kin sa ujor ruh da ka ejahar ha Mawlai Police Station ban pynlong ïa ka jingtohkit halor kane ka jingjia.
U Principal jong ka College u Dr. Myrthong u la ïathuh ba la bunsien ki la kyrpad ïa ka Sports Department ba kan weng noh ïa ki tiar namarba la jan long klas bad dang hynnin ka sngi Balang ruh ki la wan jurip hynrei ka la mih pynban kane ka jingjia ha kane ka step.
U Dr. Myrthong u la suba ba ka lah ban dei ka jingthut jong ka bording namarba ha ka por ba la jia kane ka jingjia ïa ka kamra la khang tala bad ym don ba rung shapoh.
U la ong ba la lah ban pynlip ïa ka ding hadien kumba shiteng kynta hadien ba la wan poi ki lai tylli ki kali pynlip ding.
